قول للزمان أرجع يا زمان

العيد قرب أوى

وبينى وبينكم زعلانة جدا ومش مبسوطة خالص

ياريتهم ينفعوا يلغوا العيد

حاسة إن فية حاجة ضاعت منى

حاسة أنى كبرت جدا ومبقاش العيد عيد

الله على العيد بتاع زمان

لما كنت صغيرة جدا

لما كنت لسة بجيب لبس عيد

وأفضل كل يوم أطلعة أتفرج علية

وليلة العيد دى ببقى هموت من الفرحة

وأسهر طول الليل أوضب فى نفسى وأستشور شعرى وأحضر التوك

وأحط هدوم العيد وجزمتى الجديدة جمبى على السرير

ويدوبك أنام ساعتين بس

وأصحى لوحدى من النجمة

وأجرى ألبس هدوم العيد

وأنزل أفوت على أصحابى إللى معايا فى المدرسة

وننزل نعيد فى الشارع

مكناش بنروح بعيد

كنا بنلف فى المنطقة بس

نشترى بمب ونركب المراجيح ولازم ناكل كشرى

مش عارفة أية علاقة العيد بالكشرى ومحلات الكشرى

بس كان لازم كشرى من عند محل أبو سمرة بالذات

ونقضى طول اليوم سرمحة فى الشارع من بمب لعجل لكورة لمراجيح

وأخر اليوم بنتصور

كان عيد بسيط جدا

مكناش بنعمل فية حاجات غالية ولا كبيرة

بس بجد كانت أسعد أيام حياتى

أد أية كنت طفلة بريئة مش فاهمة أى حاجة فى الدنيا ولا شايلة هم الحياة

أد أية كانت أى حاجة بسيطة بتسعدنى

دلوقتى حاسة إن كل دة راح

ومش حاسة بأى طعم للعيد

حاسة أنى لوحدى ومش هعرف أروح العيد

وقول للزمان أرجع يا زمان