2007/12/24
نَزف عاشقة
كتبتها مروة الزارع الساعة 4:38 PM 110 عبرونى وردوا عليا
2007/12/21
تجربتى فى وكر ال لا أدميين
اللى هقولة فى البوست دة تجربة حقيقية حصلت معايا فعلا
هدفى من انى احكيها انى عاوزة اوعى بنات وشباب كتير من انهم يغلطوا نفس غلطتى
ممكن يقعوا فريسة لناس معندهاش ضمير ويضروهم فى أى حاجة حتى لو حاجة مختلفة عن قصتى
ناس كتير مش ممكن تصدق إن ممكن يحصل كدة فى الدنيا
بس فعلا حصل معايا كدة .. ناس كتير اوى معدومين الضمير والإيمان بالله
اللى شجعنى اكتب البوست دة مسلسل قضية رأى عام بتاع رمضان
أنا شفت أد أية يسرا كانت شجاعة ومخافتش مع أنها أغتصبت فعلا
حسيت أنى لازم أتكلم وأنى معملتش حاجة غلط أخاف منها وبالعكس كمان أنا ربنا نجانى
حسيت أنى لازم أقول حاجة وأوصل رسالة
حسيت أنى كنت ضحية مش مذنبة ولازم أتكلم
حصلت التجربة دى قبل رمضان بشوية من العام الحالى
أسمحولى أحكى وأسمعوا معايا وركزوا كويس
.....................
كنت ماشية فى الشارع قبل رمضان بشهر ونص تقريبا وراجعة من شغلى ولا بيا ولا عليا
رن تليفونى برقم غريب .. اترددت ارد ولا لاءة عشان انا من عادتى مردش على الارقام الغريبة
الح الرقم بإستماتة فرديت ولاقيت واحدة بتسأل عليا
الصوت المجهول : ممكن أكلم مروة
أنا : أيوة أنا مروة مين معايا
الصوت المجهول : أنا ملك يابت مش فاكرانى وحشانى يخرب بيتك
أنا : ملك مين يأفندم؟
الصوت المجهول : ملك يابت إللى كانت شغالة معاكى فى المكان الفلانى من سنة ونص
أنا : اةةةةةةةةة يخرب عقلك انتى اختفيتى فين كل دة وحشانى والله ,, كدة تخونى العيش والملح .. كنتى فين كل دة وأية إللى فكرك بيا فجأة كدة .. وحشانى ياشيخة جداااااااا انتى كنتى فين ورقمك اتلغى كمان من الخدمة
ملك : على مهلك أنتى بالعة راديو يابت .. انا اتجوزت وربنا كرمنى .. وخطى وقف وكنت مشغولة بمشاكل كتير وأفتكرتك قولت أكلمك
أنا : والله فيكى الخير يا ندلةةةةةةةةةةةةةةةةةةةةةةةةةة
ملك : خدى جوزى معايا وعاوز يسلم عليكى من كتر اللى حكيتلة عليكى .. أسمة هيثم
أنا : لا لا لا لا استنى بس
هيثم : الووووو انسة مروة .. انا هيثم جوز ملك حبيت اسلم على حضرتك
أنا : اهلا بحضرتك ومبروك للجواز جات متأخرة معلش مكنتش اعرف اصلا
هيثم : ولا يهمك انا سعيد انى كلمتك .. ملك حكتلى عليكى كتير جدا وعلى اخلاقك العالية
أنا : الله يكرمك ويخليك دة من ذوقكم بس
هيثم : ان شاء الله هنتصل بيكى على طول ولازم تزورينا
أنا : بإذن الله ومرسى لسؤالكم ممكن ملك من فضلك
ملك : ايوة يابت .. دة رقمى سجلية .. هكلمك تانى .. سلاااااام
ومشيت انا افكر فى امر المكالمة دى .. ملك كانت صاحبتى جامد جدا من شغل قديم وهيا فى سنى تقريبا بس كان معاها دبلوم تجارة بس وكنا أصحاب جدااااااا .. بس بقالى فترة جامدة معرفش عنها حاجة حوالى سنة ونص تقريبا
اية فكرها بيا فجأة كدة .. بس حاجة حلوة اوى انك تتلم على أصحاب قدام بعدوا عنك ومتعرفش عنهم حاجة وبالخصوص لو كان بينك وبينهم ذكريات حلوة وعيش وملح
المهم روحت البيت وتوالت الأيام وصاحبتى المحترمة ملك بقت تتصل بيا كل يوم تقريبا وترغى معايا بالساعات عالموبيل
وكانت بتحكيلى مشاكل وحوارات وانا احلل وانسق واحل وأظبط وأرتب وأندوش
وكانت بتكلمنى هيا وجوزها وكانوا بيبقوا متخانقين واحل لهم كل المشاكل
مرت الايام وفات اكتر من شهر على دة الحال وبقينا اصحاب جامد جدا وضربوا معايا صحوبية جامدة
طلبوا كتير يقابلونى بس كنت مشغولة جااااااااااااامد موت وبخلع منهم بحجج حقيقية بلطف
المهم
جة فى فترة كنت انا مخنوقة فى شغلى جامد وعاوزة اسيبة ومكنش ادامى شغل تانى
انا فعلا محتاجة الشغل ولازم اشتغل ومينفعش اقعد فترة عاطلة ادور على شغل
كنت مدايقة ومش عارفة اعمل اية
اتصلت بيا المعلمة ملك .. من ضيقتى حكيت لها
قالتلى .. متخافيش انا فى ضهرك .. جوزى عندة مصنع ملابس محتاجين فية حد للإدارة
قولتلها بس دة مش تخصصى يا ملك ومعرفهوش خالص .. ممكن تشوفيلى حاجة تانية افهم فيها
قالتلى متخافيش خالص احنا محتاجين حد يمسك الإدارة ويراقب على العمال ويمسك الوارد والخارج وكدة
دى حاجة بسيطة مش محتاجة اى مجهود ولذيذة جدا وخليها مؤقت لحد ماتلاقى تخصصك
واحنا عالعموم مصنع متخصص متخافيش
اقتنعت انا بالفكرة جدا والمرتب كمان كان جامد قد اللى باخدة 3 اضعاف وحسيت انها شغلانة سهلة ومريحة
وقولت لنفسى اهى حاجة مؤقتة وخلاص
اتفقت اقابلها تانى يوم ونروح المصنع
قابلتها 10ص فى المكان المتفق علية
وقابلتنى بكل الترحاب والتقدير
وكانت لابسة ماشاء الله إسدال فضفاض وبصراحة غيرت منها وأتمنيت ألبس زيها وقولت ماشاء الله عليها
ورحنا المصنع وطلعوا ساكنين فى الشقة اللى فوق المصنع وبينهم سلم داخلى مع العلم إن المصنع دور أرضى
ورونى الشغل فى المصنع نظامة اية بجد
واتعرفت بالعمال ومسكت الدفاتر وحاولت افهم حاجات كتير
وخلص اليوم واشتغلت فية بجد وحاولت أفهم مع أنة كان صعب عليا كأن حد بيكلم شخص (أمى ) عن الإنشطار النووى
المهم
اتحايلوا عليا نطلع نتغدى فى الشقة بتاعتهم وأتفرج عليها وإحنا خلاص بقينا أهل والحقيقة انا كنت مرتبطة بمعاد فأعتذرت بشدة مع إن إصرارهم كان جامد
ورحت تانى يوم وأشتغلنا برضة بجددددددددددددددد وحولت أفهم بجددددددددد وأخر اليوم أصرت ملك أننا لازم نتغدى سوا أنا وهيا وهيثم رايح مشوار مع أصحابة يزورا مريض وهتبقى هيا لوحدها ياعينى ونفسها أطلع بيتها أزورة
بصراحة طلعت وكان لازم أطلع .. أنا وثقت فيها فعلا
ملك عشرة عمر وياما كلنا عيش وملح
ياما حكيتلها وحكيتلى وقعدنا وضحكنا وبكينا
ومشفتش منها حاجة غلط قبل كدة غير طيش البنات العادى بتاع الحب وكدة
وكمان فى اليومين اللى اشتغلت معاهم فية شوفت اخلاق عالية وكانوا بيصلوا الصلاوات فى مواعيدها لدرجة انهم خلونى اتكسف من نفسى انى ساعات بأخر الصلاة شوية وكنت متغاظة جدا أنى أقل منهم فى العبادات وقررت أنى لازم أصلح من علاقتى بربنا من شدة كسوفى
المهم روحنا السوق أنا وملك وأشترينا لحمة وبطاطس وحلفت انى لازم اطبخ بأيدى معاها وأعتبر البيت بيتى
وطلعنا البيت ويومها أنا كنت لابسة عباية لف طالعة موضة كدة وتحتها بنطلون جينز وبدى حمالات
خلعت العباية وقعدت مرحرة بالبنطلون والبادى والدنيا كانت حر وكنت انا وهيا بس وخلعت الطرحة كمان .. براحتى بقى
ودخلت معاها المطبخ وطبخنا سوا وعملنا صينية بطاطس باللحمة ورز بالشعرية وعصير جوافة
وكلة عملاة بأيدى
وشغلنا أغانى وخدت عالبيت وأطمنت عالأخرررررررر
الأكل أستوى وكنت أتأخرت جدااااااااااااااااااااا
قالتلى هنتغدى وهتمشى على طول
غرفنا الأكل وقعدنا على ترابيزة واحد ة
عيش وملح .. تااااااااااااااااااااااااااااانى
ويدوبك كلت معلقتين رز وشربت نص كوباية العصير وحتة بطاطس واحدة
حسيت بحاجة غريبة بتحصلى
كدبت نفسى
بس بعد ثوانى مكنش فية مجال للتكديب خالص
حسيت بتمنيل فى وشى وجسمى
التمنيل عمال يزيد وإحساس كدة فى وشى كأنى راحة أخلع درسى وواخدة بنج
قلقت وقولتلها أنا عاوزة أمشى وجريت على عبايتى ولبستها
الموضوع عمال يزيد لدرجة انى معرفتش اربط العباية
والمشكلة كمان انى لسة عاملة حادثة من اقل من سنتين وعملت 3 عمليات فى ايدى الشمال ورا بعض
فحسيت انى بحس بنفس اللى بحسة اثناء العملية
حسيت انى بتخدر
أيوة بتخدر .. مفيش مجال للتكديب أو الشك
الرؤية بتروح تدريجا
بقيت شايفة غيوم والصورة عمالة تتلاشى من قدامى
رعب الدنيا كلة حسيت بية
رعب حقيقى .. مش ممكن حدى يتخيلة أبدااااااااااااااااااااا
مش ممكن حد يتخيل احساسى فى الموقف دة مهما حاول يفكر ويتخيل
رعب عمرى ما تصورت انى ممكن احسة أبد أبدا أبدا
الحمد لله ربنا خلانى افكر واترجم الموقف بشكل منطقى
فى ثانية استوعبت الموقف .. انا بتخدر .. ثوانى وهغيب عن الوعى .. انا انتهيت
كل دة وانا واقفة بحاول اربط رباط العباية وحافية وشعرى مكشوف ومش معايا لا شنطة ولا موبيل ولا اى حاجة
جريت على الباب لاقيت الباب دخل منة الاخ هيثم
مش ممكن مهما طال العمر بيا انسى نظرتة ومع انى كنت خلاص مش شايفة حاجة
مقدرتش اعمل حاجة غير انى ارقع بالصوت
صوت ومش اى صوت مليااااااااااااااااااااااان برعب العالم كلة
مسكنى مسكة قيدتنى فى ثانية وكتم نفسى بأيدة كتمة جامدة ومن الناحية التانية الهانم ملك كانت مساكنى وبيحاولوا يدفعونى بعيد عن الباب
والحمد لله قوة بناينى أخرهم لحظة
لحظة بس حددت مصيرى وأنقذت حياتى
راح الأخ هيثم مطلع لى مطوة .. أنا مخفتش منها لأنى كنت مش مركزة أصلا فى حاجة
ممكن لو كنت فى حالتى الطبيعية كنت خفت .. مش عارفة .. انا بحكى اللى حصل
فى اللحظة دى الباب خبط وفتح هيثم وسابنى لملك لحظات بس بعد ما كان متأكد أن قوايا خارت
وفتح الباب ودخل منة أكتر من راجل ممكن يكونوا 3 تقريبا
كانوا شايلين حاجات كتيرة جدا بجد مش عارفة هيا أية لأنى مكنتش شايفة أوى
بيدخلوها جوة ودخل هيثم يساعدهم
لحظة واحدة أنقذت حياتى
فى اللحظة إللى بيتلفت فيها هيثم عشان يقفل الباب ويدخل الحاجة مع الناس.. كنت أنا خرجت منة
أقسم بالله أنا مش عارفة إزاى عملت كدة لحد دلوقتى
أقسم بالله مش عارفة لولا اللحظة دى كان مصيرى بقى أية
خرجت أدام باب الشقة وسيل جارف من الصويت
الحمد لله كان فية شوية شباب نزلين من الدور إللى فوقينا
لولاهم كنت ضعت وأنتهيت
لولاهم كانوا دخلونى وقفلوا الباب وكل حاجة خلصت وأنتهت
الشباب جيهم جرى فية أية فية أية؟
قبل ما حد يرد ولا يبرر كنت أنا فى الشارع جرى عالسلم زى المجنونة
حافية وبشعرى وبعباية مفتوحة كاشفة صدرى كلة ومسطوووووووووووووولة
ايوة مسطووووووووووووووووووووووولة بمعنى الكلمة
لدرجة ان دبوس مكتب كامل دخل فى رجلى من غير ما أحس بية
جريت فى الشارع وسيل من الصرررررررررراخ إللى مش ممكن يطلع إلا فى حالة رعب جارف
رعب حقيقى وهستريا بجد
ومكنتش شايفة أى حاجة .. كانت الرؤية أنعدمت أو شبة إنعدام
دخلت أول محل أدامى وأنا بصرخ صراااااااااااااااااااخ فظيع
والله العظيم لحد دلوقتى معرفش هو كان محل أية
والله العظيم مش عارفة جاتلى إزاى الجرأة أصرخ كدة ولا أعمل كل دة .. عمرى ما تخيلت أنى ممكن أعمل كدة فى يوم
الشبابيك أتفتحت كلها عالصويت والناس طبعا أتلمت
دخلت المحل لاقيت راجل كدة كبير فى السن ومعرفتش كدة إلا بعد ما فقت حبة
مسكتة من قميصة مسكة الغرقان إللى عاوز ينجى بأشاية
وحولت أتكلم ومعرفتش لسانى كان تقيييييييييييييييييييييييييل بطريقة لا توصف
مكنتش قادرة أحركة
كأنة متقيد بأغلال
مكنتش قادرة غير أصرخ بهستريا ورعب العالم كلة فى عنيا
الراجل حاول يهدينى ويفهم منى وقعدنى وحاول يمشى الناس إللى أستماتت أنها تقف وتتفرج
وجاب لى مخلل كتيييييييير مش عارفة لية
وشربنى يجى جردل قهوة
رجعت كتير جدا ليا وللزمن
كنت حاسة أنى هرجع معدتى نفسها
وشروبنى مية بملح كمان
تصوروا مكنتش حاسة طعم الملح حتى .. مع أنه كيس ملح كامل فى كوباية مية
وحاولت أحكى الحكاية بلسان متقطع تقيل مقيد مهزوز
وحكيت قدام كل الناس على إللى حصل وأنا شبة مسطولة
ولاقيت أدامى الزبالة الندل هيثم واقف مبلول
ومن بجاحتة جاى يقول لهم دى واحدة صاحبتى كنا قاعدين قاعدة مزاج وشربت خمرة كتير .. انا هروحها وكان عاوز ياخدنى
رجعت انا اصرخ تانى بنفس الهستريا .. ومسكت فى الراجل ماسكة فظيعة جدا .. قميصة كان هيطلع فى أيدى والله
وقولتلة متسبنيش ياعمو ارجوك أرجوك دا كداب .. روحنى انت البيت
الراجل الله يسترة دنيا وأخرة قالة حتى لو كلامك صحيح انا مش هسيبها .. أطمنت وهديت والناس ابتدت تمشى
والراجل قالى متخافيش انا هروحك لبيتك
وسألنى عن هدومى .. وبعت ناس جابتلى هدومى من وكر النجاسة إللى كنت فية
وجات واحدة الله يسترها لبستنى الشوز بتاعى وطرحتى ولفتلى عبايتى وبعد ما فوقت أتأكدت من كل حاجتى وأوراقى فى شنطتى
وفضلت ماسكة فى الراجل وأنا بترعش
كان عندى حالة هستيرية فظيعة
الراجل قفل محلة وجة هو والست اللى لبستنى الطرحة وراجل تانى كمان وخدونى فى عربيتهم وروحنا المستشفى
لانى كنت بموت وبرجع ترجيع متواصل ووشى ازرق جامد وشفايفى كمان + رعشة فظيييييييييعة
فى المستشفى التحليل أثبت نسبة مخدر عالية جدا مع شوية تلويث فى المخدر دة قلب معايا بتسمم كمان + التخدير نفسة وأدونى عقار مضاد
الدكتور قالى أحمدى ربنا وبوسي أيدك وش وضهر وصليلة وأسجديلة العمر كلة
العمليات اللى انتى عملتيها ورا بعض ولأنك أتعرضتى لتخدير فى العمليات دى خلت سريان المخدر بطئ وخلتة مخدركيش جامد للنهاية
+
انى كنت واكلة كمية كبيرة من الشكولاتة ووجود دهون بيبطئ عملية التسمم
وكان عاوز يتصل بالشرطة
اترجيتة بلاش .. انا بنت .. سمعتى
الراجل اللى كان معايا اترجاة هو كمان حفاظا على سمعتى
مع انى انا الضحية
وفقت وركزت تقريبا بس مش اوى
وعرفت ان الست دى مرات الراجل بتاع المحل والراجل التانى ابنهم
ورحنا قعدنا فى مكان (كافيتريا ) عشان يخلونى افوق واستريح قبل ما يروحونى
وحكيت لهم القصة بهدوء
غلطونى فى حاجات كتير
زى انى إزاى أطلع بيت ناس غريبة وكدة
وقالولى انتى ربنا بيحبك .. اشكرية
وعرفت منهم ان ملك وهيثم دول لسة جايين المنطقة جديد جدااااا
وملك مش مرات هيثم وصاحبتة وعايشة معاة كدة وسمعتهم زفت زفت زفت
وعرفت كمان انهم ليهم سابقة مع واحدة غيرى ربنا مأنقذهاش
وجت تفضحة فى المنطقة وقالت أنهم خدروها وصوروها وبيبتزوها بالفديو والصور وهيا متجوزة وعاوزين يشغلوها فى الدعارة وإلا يفضحوها يا أما تدفع فلوس مقابل السكوت
بس محدش صدقها لان محدش يتصور ناس كدة
بس دلوقتى هما صدقوها لما شافوا اللى حصل معايا بنفسهم
معقولة انا كان هيتعمل فيا كدة وكنت هتصور كمان احمدك يا رب
وروحونى لحد باب البيت
وروحت نمت لانى كنت مصدعة جدا ومش قادرة ارفع راسى من الألم والتقل
ولما صحيت بعد نوم يوم كامل
مكنتش مصدقة إن كل دة حصلى .. وأفتكرتة حلم فظيييييع .. إلا لما أتصل بيا الراجل بتاع المحل إللى ودانى المستشفى وأطمن عليا
أفتكرت كل حاجة وحمدت ربنا بجد وسجدت شكر لية
بعد كدة فكرت إزاى أنتقم من الراجل دة إللى أسمة هيثم هو ومراتة
وعرفت من الراجل بتاع المحل فى التليفون أنهم طردوة ليلتها من المنطقة
ملقتش فى أيدى حاجة أعملها تانى لأنى لوحدى فى الدنيا
حمدت ربنا ومن يومها وأنا بشكرة بجد وبركع لة
أنا فى قصتى دة بوعى بنات كتير أنها ممكن تقع زيى فى حاجات كتير
أنا غلطت أنى طلعت بيت حد مهما كنت أعرفة
غلطت أنى أديت ثقة من غير حذر
بجد مش عارفة أنا غلطت ولا أية؟
بس كان لازم أثق فيها دى كانت صاحبتى جامد
بجد مش عارفة
المهم ربنا نجانى
بشكرك يارب أوى
أنت يارب نجتنى كتير
نجتنى من الحادثة ومن موت محقق
نجتنى فى كل العمليات اللى عملتها بعد الحادثة
نجتنى لما مرة اتجننت فى عقلى زمان وانتحرت ومرضتش انى اموت كافرة
نجتنى من الوحوش ملك وهيثم
رميتنى فى طريق بابا علاء
بشكرك يارب بجد
ويارب أهدى أى حد مش كويس وبيحاول يضر الناس ويغضبك
أمين يارب
كتبتها مروة الزارع الساعة 8:02 PM 139 عبرونى وردوا عليا
2007/12/19
عرفان كبير بالجميل
كتبتها مروة الزارع الساعة 11:07 PM 19 عبرونى وردوا عليا
2007/12/17
الليلة عيد والصنف شديد
فية حد قال قبل كدة جملة عجبتنى وبجد مش عارفة هيا بتاعت مين
جهل بقى معلش
بتقولك اية يا سيدى .. طرطقلى ودانك كدة
ياشعب زى الرصيف عاوز يتكنس .. فية ناس بتعرق عالرغيف وناس بتعرق مالتنس
وبما إن بكرة الوقفة
هتكلم فى الموضع دة
زمان وانا صغيرة كانت فكرتى عن ليلة الوقفة والعيد مختلفة جداااااااا
كانت الوقفة دى اللى بنفرش فيها الشقة ونحط اللمسات الاخيرة بعد اسبوع من المسح والدعك والتنضيف
وبنستحمى (حمية العيد يعنى) ونوضب نفسنا ونكوى هدوم العيد وكدة يعنى
والعيد زمان كان عشان نتفسح ونخرج ونزور اصحابنا وقرايبنا وكدة يعنى
لما كبرت لاقيت ان العيد حاجة مختلفة تماما عند ناس تانية
احتكيت بيهم فى الجامعة وفى الشغل
وسمعت قصص ما بعدها قصص
وكان نفسى اكتب من زمان بس مكنتش عارفة اقول اية ولا اكتب اية
لما كبرت لاقيت ان ليلة الوقفة دى اهم ليلة عند شباب مصر
من الاخر هيا العيد نفسة
و بيبتدوا يحضروا للوقفة من قبل العيد بكذا يوم
و التحضير بيكون لحاجتين
أولا : المخدرات المخدرات المخدرات المخدرات المخدرات
ثانيا : البنات
والبنات بيكونوا حد مصحبينة او اى حد مظبتينة بفلوس .. انا اسفة فى الالفاظ لمؤاخدة
وعلى فكرة موضوع ليلة الوقفة مبقاش مرتبط بالشباب الاغنيا ولا حاجة
دلوقتى اى حد بيتكيف ليلة الواقفة
غنى او فقير
كبير او صغير
واسعار خاصة للطلبة
من الاخر البلد كلها بتخرب الليلة دى
اتحكالى بلاوى يا جماعة
بيبتدوا الاول يتجمعوا عند اى واحد من اصحابهم
وبيسموها (مكنة) بضم الميم
وغالبا بتكون شقة اى واحد من اصاحبهم اهلة مسافرين او قفلينها او مش فى دماغهم
ولو كانوا مظبتين بنات بيجبوهم معاهم
ولو مكنوش ظبتوا بيلفوا فى الشوارع يظبتوا يعنى
وبعد كدة يعملوا ( الاصطباحة) أستمورننج يعنى بالمخدرات والخمور
فى (المكنة) مع البنات
هى دى ليلة العيد لكل شباب مصر تقريبا دلوقتى او بنسبة كبيرة جداااااا
و الكلام دة مش في وقفة العيد بس ..لأ
العيد الكبير والعيد الصغير و رأس السنة و عيد الأم و الطفل و 6اكتوبر
وعيد الفلاح حتى
و اي مناسبة وطنية او شعبية او اجتماعية
بس فى وقفة العيد اكتر حاجة
من الأخر الشباب بيخرب فى الليلة دى
وعلى طول
علشان ميفكرش فى اى حاجة
وكل سنة وانتم طيبين برضوا
خلى الدماغ صاحى
اديلة الحقنة بسرعة ارجوك محتاج الجرعة
بيظبط مزة فى الوقفة ... عااااااااااااااااادى
كتبتها مروة الزارع الساعة 11:41 AM 65 عبرونى وردوا عليا
2007/12/13
ب 2.5 وتعالى بص
ونقعد بقى حضراتكم فى الطريق إللى مش بياخد 10 دقايق
كتبتها مروة الزارع الساعة 11:02 AM 60 عبرونى وردوا عليا
2007/12/12
عندما تصبح الطعنة أكبر من مساحة الجسد
عندما تهتم بشخص لأقصى درجة
وتكتشف فجأة أنك في آخر زاوية من زوايا حياته
عندما تشعر بضيق وتبحث عن ذاك الصدر الحنون ليضمك وترمي إليه أثقالك
وتجد صدرة قد أصبح أشواكاً تمزق جسدك
عندما يتجاهلك أحب من لك فى الوجود ولا يشعر بك
عندما تصبح مساحة طعنتك أكبر من مساحة جسدك
كتبتها مروة الزارع الساعة 11:01 AM 39 عبرونى وردوا عليا
2007/12/11
منتهى .. منتهى الديمقراطية
هل تسمعنى .. هل تسمعنى .. حووول
لو حد عمل أى حاجة هنجيبة من قفاة .. حووول
وهنحط السيخ المحمى فى صرصور ودنة ... حووول
(LOL)
كتبتها مروة الزارع الساعة 7:14 PM 16 عبرونى وردوا عليا
2007/12/10
قول للزمان أرجع يا زمان
كتبتها مروة الزارع الساعة 12:12 PM 25 عبرونى وردوا عليا
2007/12/09
2007/12/08
إهداء خاص
نعم انها محاولة لنسيان العذاب والجروح والآلام
كتبتها مروة الزارع الساعة 11:31 AM 19 عبرونى وردوا عليا
2007/12/05
أنا والفواتير وقفاك
فين أيام الزبال إللى كان بيجلنا لحد البيت وبياخد 3 جنية بس
وإللى أنا بقى مش قادرة أفهمة لية بياخدوا فلوس الزبالة مع الكهربا
تعرفوا ياجماعة أن فى محلات تجارية بيدفعوا من 80 ل 180 جنية قمامة بس
وهتصدقوا كمان ياجماعة إن فية ناس رفضوا يدفعوا رسوم جمع الزبالة دى
تفتكروا إن من حقها تقطع النور عشان مبيدفوع تمن الزبالة؟؟؟
التعاقد مع شركة الكهرباء ينص علي ان نسدد لها رسوم مقابل استهلاك الكهرباء فقط
من الأخر أنا راحة أشيل الختم
كتبتها مروة الزارع الساعة 2:13 PM 10 عبرونى وردوا عليا
يبقى أنت أكيد أكيد فى مصر
لما متسمعش غير حمير بتنهق هنا وهناك وحبة فوق وحبة تحت وهيلاااا هؤة
يبقى أنت أكيد أكيد فى مصر ... ترااا لام لام
لما تتشرد فى الشوارع ومتلاقيش حتة تلمك ولا شقة تتجوز فيها
يبقى أنت أكيد أكيد فى مصر .. تراااا لام لام
لما متلاقيش مواصلة تركبها
يبقى أنت أكيد أكيد فى مصر .. ترااا لام لام
كتبتها مروة الزارع الساعة 9:59 AM 8 عبرونى وردوا عليا