ب 2.5 وتعالى بص

(البلد فااااااااااااااااااااضية والشوارع راااااااااااااااااااااااااااااايقة)

(مفيش تقليب يا مدام)

أوعى حد منكم يكون من الناس الأغنيا الوحشين إللى ساكنين فى فيلا فى مارينا

وعندهم (خمناشر) عربية

(lol) طبعا أنا عشان حاسة بيكم عملت البوست دة

أنا عارفة طبعا أنكم كلكم مطحونين زىى وأكيد عند كل واحد منكم سوق كبير أسبوعى فى منطقتة

ممكن حد يكون عندة سوق التلات او الاربع او الجمعة او الاحد

وتبقى أمة داعية علية لو ساكن جمبة

انا بقى يا معلمين هكتب لكم يوم خميس

.................

يوم من ايام الخميس

انا اصلا ساكنة فى سوق

سوق كدة على ادة يبدوبك 7 نشالين بس

وشوية خضار على كام عربية مخلل

هو اصلا مكنش سوق

دة كان شارع عادى بس سبحان مغير الاحوال

المهم مطولش عليكوا

صحيت يوم الخميس الصبح

وما ادراك ماذا يعنى يوم الخميس بالنسبة لى

يالا بقى مش هسود عليكم اليوم المفترج دة

اول ما قمت من النوم طبعا اتفزعت لان لعلم حضاراتكم الواحد عشان يخرج يوم الخميس

فية معادلة لازم يعملها

مثلا لو مشوار هياخد ساعة لازم يضيف ساعة ونص اضافى

مثلا انا عندى مشوار 11يبقى اخرج من الساعة8.5 على الاقل

ودة لو المشوار اصلا هياخد ساعة

المهم

الواحد يخرج من بيتة من هنا ويقابلنى لو عرف يخرج من المطرية

عند وقبل مستشفى المطرية كدة هتلاقى مهازل

وللأسف مقدرتش احط صور تعبر اكتر

هتلاقى بتوع الكوارع والفشة والمنبار بدمة فارشين على الارض

وعلى المتوسكلات مليانة بلاوى زرقا من لحمة وكدة

كأننا فى مدبح بالظبط وبتوع الفراخ واقفين يدبحوا و

ينضفوا على الرصيف والريش فى كل حتة والريحة اية عسل

وبتوع السمك قاعدين ينضفوا وقشطة

والغريبة انك تلاقى مثلا واحد بينضف فراخ وجمبة بالظبط واحد بيبع ملابس داخلية

والستات واقفة تنقى فى وسط الطريق عاااااااااااااادى

وتلاقى الست من دول ماسكة قطعة الملابس الداخلية كدة وكأنها فى بيتها

وناقص تقلع وتقيصها

والغريبة انك تلاقى هناك من الابرة للصاروخ

أغذية فاسدة ماشى

لحمة متعرفش لحمة أية شغال

بواقى سوبر ماركت منتهية الصلاحية مفيش مانع

كل حاجة يا حضرات والحاضر يبلغ الغايب

والغريبة ان كل حاجة هناك ممكن تتباع سايبة

حتى البسكويت الراسكو والشمعدان والشيبسى والبوزو

كل حاجة بجد

وطبعا كل زى ما تقول متاكل قبل كدة

والناس بتشترى ومش هاممها حاجة

وطبعا غير اقسام الشهرة

زى قسم تجارة المخدرات

وقسم الموبيلات المسروقة

والجزم المسرقة طبعا

وقسم الادوية وخلافة
ونقعد بقى حضراتكم فى الطريق إللى مش بياخد 10 دقايق

ممكن ساعة وساعة ونص

دة غير الريحة والمهازل اللى بتحصل

والسرقة والنصب

واليانصيب والكوتشينة (قمار يعنى) أة والله

وجيهم من فترة ضحكوا علينا وقالوا هينقلوا السوق

ولكن هو زى ما هو اتنقل يومين كدة ورجع تانى

وكل التغير انهم فضوا الميدان بس عشان نبقى فلة ومحدش ماسك علينا حاجة

انما المأساة هيا هيا فى باقى الشارع وكل الشوارع من جوا فى الدرا يعنى

وكان لى اللقاءات المهمة التالية

كان لى لقاء مع السيد : عباس متولى

الذي جاء الى السوق عشان يشترى فرشة سنان مستعمله حيث افادنى بمعلومات قيمه جدا

وقالى فرشة السنان الجديده بتكون تخينه ومشرشره وبتسبب لي الم في رجلي الشمال

اما الفرشه المستعمله بتكون رفيعه ومسخسخه ولا تسبب أي آلم بالمعده

‏وكان لى لقاء ايضا مع السيدة فكاهات التى تبيع بقايا السوبر ماركت

ولما سألتها قالتلى منتهية الصلاحية وفاسدة إيه يا عسل ‏..‏ الله يكرمك بلاش وقف حال‏

‏ وحياة النبي بناكل منها وبنطبخ رز باللبن كمان وكله زي الفل‏

وواحدة تانية قالتلى ‏شوفى يابشمهندزة ‏ قولى بسم الله الرحمن الرحيم قبل الأكل‏

‏ وربنا سبحانه وتعالي يجعل السم النافع شهد مكرر‏

إلى كل من يسكن المطرية ومسترد وشارع الترولى

وشارع المطراوى والمسلة وعين شمس والمناطق المجاورة

وأى منطقة زينا

ربنا معانا

قسم الكهرباء والإنارة الحديثة

مفيش شئ مش موجود





قسم الأحذية الإيطالى




قسم الملابس ... الحديثة طبعا

قسم البصريات

من الأبرة للصاروخ

قسم مستلزمات المطبخ الحديث

قسم مستلزمات البيت الحديث

(كل ياعم ومتسألش.. حد عارف حاجة)

ورونى بقى هتعدوا من هنا إزاى .. بس اوعى

تعدى اول الشهر بالمهية يامعلم

(لو جزمتك مسروقة ممكن تلاقيها هنا)

(وأوعى تنسى وأنت مروح تشرب من عند عبدة تلوث)