2009/11/14

بلا وكسة

أنا لسة عارفة بموضوع ماتش مصر والجزائر دة بس امبارح
عبيطة مش كدة
اكيد ناس كتير شايفانى مختلة عقليا دة بالنسبة لكتير أهم حدث فى التاريخ
والله أنا ما كنت عارفة حاجة
أصل أنا هنا عايشة فى مية البطيخ
وبما أنى لسة مدخلة النت فى بيتى الجديد من أسبوع بس
فحياتى أتقسمت إللى ما قبل النت وما بعد انت على وزن ماقبل وبعد التاريخ
كانت حياتى مفيهاش غير بانوراما دراما وروتانا سينما وأحيانا إم بى سى تو
وخصوصا أنى عايشة فى التجوع الخامس
يوووووو قصدى التجمع الخامس ونتكلم فى موضع التجوع الخامس دة بعدين
المهم نرجع لموضوع البوست
إلا يا خويا أفاجأ بالدنيا قايمة مش قاعدة
ماتش مصر والجزائر اللى هو النهاردة بالليل
وقال أية كاس العالم
سرحت مع نفسى كدة
أنا أصلى عندى عقدة قديمة من الماتشات أصلا
رجعت بذاكرتى لبابا الله يرحمة
وأحنا صغيرين كان بابا بيحب الماتش جدا
أى ماتش حتى لو فريق اللهو الخفى مع فريق عفريت الظلام
وياسلام لما الأهلى والزمالك يلعبوا
كان بيبقى يومنا مدووووووووحس لما الزمالك تتغلب
وطبعا كان بيبقى مدوحس على طول هههههههههههه
وياسلام بقى لو غلب
كل اللى نفسنا فية كان بيجى وأطلب وأتمنى يا عم كأننا لاقينا خاتم سليمان
وبابا كان بقى يقعد يتفرج على الماتش
وأحنا نفسنا نشوف مسلسل الساعة 7 أو كارتون مازنجر على القناة التالتة
وأعيط لة والنبى يا بابا عاوزة مازنجر عااااااا
وبابا يقول
غورى يابت من قدامى انا الشياطين بتتنطط فى وشى
شوط يالااااااا شوط
أوباااااااااااااا
شوط يالا يابن (تيييييييت) شووووووط
ومن أيامها كرهت الماتش
كل الموتشا اللى فى الدنيا
ولما كبرت فكرت كدة
هما لية مديين الموضوع كدة أكبر من حجمة
يعنى دلوقتى كل الأفلامانات إللى عاملنها دى لزمتها إية
يعنى هيحصل أية لما مصر تكسب الجزائر
هيحصل أية حتى لو خدت كاس العالم
وحتى لو خدت شفشق العالم مش كاس واحد
اية يعنى
ديون مصر هتتسدد
الناس هتلاقى تأكل عيالها
الموظفين هياكلوا لحمة كل يوم
الشباب هيشتغلوا ويتجوزوا ويخلفوا
مش عارفة والله بلا وكسة
ملحوظة
عارفين أحلى حاجة أية
إن حودة جوزى مبيحبش الماتش ومالوش فى الكورة
أنا فرحانة فرحااانة فرحااانة
نيااااههههاااااااههههاااا

أخيرا رجعت معاكم


ياااااااااااااااااااة بقالى كتير اوى مفتحتش الصفحة دى عشان اكتب بوست جديد
لدرجة انى نسيت البوست بيتكتب إزاى أصلا
اكتر من سنة ونص عدت وانا بعيدة عن التدوين والمدونات والمدونين
بجد كان غصبن عنى اتشغلت فى الجواز والحمل والولادة
أتشغلت فى البيت وشغلة والجواز وسنينة
كان لسة جوايا حاجات كتير عاوزة اقولها
وهقولها
أسمحولى أرجع معاكم تانى

2008/08/18

صور زفافى وعقبال عندكم

فات النهاردة على جوازى شهر تمام

.

ولسة راجعة من شهر العسل وفات كأنة حلم

.

وبجد سعيدة أوى وعايشة أجمل أيام عمرى مع حودة حبيبى

.

فدخلت أوريكم صورى

.

مع أنى زعلانة من اللى مجاش الفرح

.

























2008/06/25

عندما تشعر أن بداخلك يتربع ندل





نظر إلى بعينين يملأهما الحزن والألم


فنظرت لة بإشفاق وأنا أكاد أتمزق من داخلى


وشعرت بأنة يأنبنى


وشعرت أنة يعاتبنى


يطلب منى العون ويردنى أن أمد لة يدى


لأخفف من معاناتة وأمسح دمعتة التى كانت تبدو فى عينية


أنة طفل لم يتجاوز السادسة من عمرة


ولكنة يحمل على عاتقة هما كبرا


ولا يملك حق الأعتراض أو المناقشة


أنة معذب وهذا ما أخبرتنى بة عيناة


نظرت لة بعمق وقلت له سامحنى


أعرف أنى من من هم السبب فى كل ما تعانية


أجابنى بحزن وقال لقد طال أنتظارى ونفذ صبرى


قلت لة لا تيأس


قال لى ألا تساعدينى


ربت على يدة وأجبتة بسؤال ؟ وماذا أفعل لك وحدى ؟ فأنا لا أجد من عذبوك معى بجانبى؟


قال لى معكى حق لا ولن يكونوا بجانبك وجانبنا


قلت لة لا تيأس فنحن أمة واحدة



أعرف أننا نشترك فى عذابك بصمتنا وعدم مسانتدنتنا


لكن لا تقلق


قال لى أليس عليكم مساعدتنا؟


قلت وأنا أغلق الجريدة التى بها تلك صورة الطفل العربى


باتأكيد سنفعل .. سنفعل


وسمعت صوتة يصرخ من بين طيات الجريدة


لا تنسونا ولا تتأخروا علينا .. الزمن لا ينتظر أحد


وظلت عبارتة


(ألسنا أمة واحدة)


تترد فى ذهنى


وملئت مقلتاى دمعة غريبة لا أفهمها حتى الأن


دمعة تحمل كل ألم الدنيا


أحقيقى نشعر أننا أمة واحدة؟

2008/06/19

منتهى .. منتهى الرومانسية



دلفت إللى حجرتها وأغلقت بابها ورائها


أمسكت بصورتة وضمتها إلى صدرها بحنان


نظرت فى عينية وشعرت بمزيج من الأشتياق والحب الجارف


وفجأأأأأة رن جرس هاتفها الخلوى


وكانت رنتة وكان هو رقمة


ياااااااااااااااااااة إلى هذة الدرجة يشعر بها ويشتاقون لبعض فى نفس اللحظة


تررررررن بابا يحب أنا صح بابا أوبح ترررررن تاتا فيها واوا يح بابا أوبح ترررن أنت حب أنا صح بابا أوبح تررررررررن


هى : أيوة يابا


هو: أيوة يامة عامل أية ياض


هى: مية فل وعشرة يابا


هو: وحشنى يالبط


هى: أنت أكتر يابا


هو: هشوفك أمتى ياض وحشنى ياريس هنتجوز أمتى بقى


هى : لا يابا أنت وحشنى أكتر يالبط


هو : هعهعهعهعهعهعهعهع يا خخخخخخخرررررراااااااااااااااااااااابى هعهعهعهعهعهعهعهع


قوليها كمان كدة


كلمة لبط طالعة من بقك عسلية


عسلية ياخواتى


هى : ماشى يالبط


هتعمل اية دلوقتى يابا


هو : هخلص الحرجين دول وافكر فيك وأنام أحلم بيك يابا


هى : كلمنى اول ما تصحى يابا


هو : ماشى ياريس


ماشى يا عسلية


أية يامة مفيش حاجة تحت الحساب قبل ما أنام


ولا أقولك


خد دول يابا


موووووووووووووة مووووووووة


هى بخجل : أخص عليك أخص


هعهعهعهعهعهع


هو السماعة بايظة عندك وبتطقطق ولا أية


هعهعهعهعهعهعهعهعهع


هو : مش بقولك لبط يا ريس


بحبك يابت ومشاعرى ومولعة يابت


الحب ولع فى الدرة يابت


هى : لاء لاء لاء يابا


بالحلال يا معلم


هعهعهعهعهعهعهعهع


هو : ماشى يالبط


تصبح على خير ياروح قلب معاميع قلبى


يانور حبابة عنيا من جوة


يا قشطة


يا عسلية


يا منجاية


هى : تصبح على خير يا روح قلب اللبط


خد بالك من نفسك يابا


هو : لا إله إلا الله


هى : محمد رسول الله


هو : أقفل يالا يابا


هى : لا لا لا أقفل أنت الأول


هو : طيب نعد لحد 3 ونقفل مع بعض


هى وهو : 1 2 3


تككككككككككككك

2008/06/07

وكتبنا الكتاب وعلينا الجواب

أنا داخلة اليوم على عجالة

عشان أعلن إن حبيبى محمود عباس

بقى زوجى على سنة الله ورسولة وكتبنا الكتاب

وعقبال عندكم

:))

2008/05/29

فضفضة لحالة لذيذة


الحــــــــــــــــــــــب ماهو الحب ؟

هذا السؤال أقدم سؤال في الدنيا

كل فنان له جواب وكل فيلسوف له رأي

كل يوم يدق قلب وينفتح ويدخله الحب

وكل يوم يتحطم قلب وتبقى حروفه منقوشة على هذا الحطام

فالذي يحب بقلبه له رأي والذي يحب بعقله له رأي

كل هؤلاء لهم أراء ومواقف

فالذي يسألني لماذا تحب

كما الذي يسألني لماذا تتنفس لماذا يدق قلبك

فالحب في نظري لا يحتمل كلمة

الحب كما يقول شيكسبير

(الحب هو مزيج من العذاب والألم والطهارة والوفاء والعشق والرهبة والفراق )

وأيضا قال ميخائيل نوعيمة

(لو جندنا كل ما في الإنسان من ذكاء وعبقرية لما استطعنا ان نصنع من القرد أنسانا لكن الحب إذا ما تربع في القلب فأنه يستطيع في طرفه عين ان يغير ما في الناس من عاداتهم وتقاليدهم )

أذا الحب هو الحل الامثل لمشاكل الانسانيه

وهو ضمير الإنسان الحي الحـــــــــــــــــــــب
هو ذلك الشعور الخفي الذي يتجول في كل مكان ويطوف الدنيا
بحثاً عن فرصته المنتظرة ليداعب الإحساس

ويسحر الأعين ..
ليتسلل بهدوء ..

ويستقر في غفلة من العقل ورغماً عنك ..
داخل تجاويف القلب ....

ليمتلك الروح والوجدان ..
ليسيطر على كل كيان الإنسان ..
والحب..

هو ذالك الشعور الذي يتملك الإنسان في داخله ويطوف به العالم

حيث يشاء بأفراحه وأحزانه يجول كل مكان فوق زبد البحر

يمشي دون أن يغوص في أعماقه
الحب ..

هو ذلك الوباء اللذيذ المعدي الذي يصيب جميع الكائنات

بدون استثناء ..
له مغناطيسية تجذب الكائنات إلى بعضها البعض ..
وبدونه لن تستمر الحياة على أي كوكب ..
للحب ..

معاني عظيمة وتعاريف عديدة تختلف من عاشق لأخر ..

فكل محب لديه تصور وتعريف
خاص لمعنى الحب..

(منقول)

......

حسيت عايزة أفضفض معاكم

حاسة أنى عايشة حالة من السعادة اللذيذة

سعادة مؤلمة من كترها

حالة مخليانى مش عارفة أعمل شئ فى الدنيا خالص

مش عارفة حتى أدون

ولا أفكر فى أصحاب

ولا أى شئ

حلم جميل

حاجة كدة مخلية كل أحساسى يروح هناك

عندة هو بس

كان حلمى زمان بجد ألاقى راجل بجد

وكان صعب فى الزمن دة ألاقية

وربنا عوضنى بجد بيك

أد أية مليت عليا حياتى

أد أية بحس معاك بالأمان وبالحنان كل الحنان

لدرجة بحسك أمى يا محمود

أوعى تزعل ههههههههههههههه أمى فى الحنان فاهم

بحس معاك حاجات كتير حتى مش لاقية لها أسم

حاجات كتير حاسة إن مفيش حروف ممكن توصفها

ياااااااااااااااااا أد أية بعشق ضحكتك

شيفاها أدامى دلوقتى

بعشقها بجد وبحس إن قلبى بيرقص من الفرحة كل ما تضحك

بحس إن ضحكتك صافية كلها نقاء وعنيك بتضحك معاها

بحس إنك إبنى

ههههههههههههههه عارفة أنك هتضحك لو قريت الكلام دة

صحيح إبنى حيطة 7 متر وباب لامؤاخذة هههههههههه

بس بجد بحسك إبنى الصغنطوط

وكتير برضة بحسك بابايا وأنا بنت الصغنططة إللى عاوزة تطنطط على كتافك

ولما تغلط تجرى تستخبى فى كمك

عارف

أكتشفت أنى بقيت أتكلم زيك فى كلامك كلة

ياااااااااااااة كأنى بقيت كوبى منك

وبعمل نفس حركاتك

مكنتش أتخيل إن الحب ممكن يعمل كدة

عارف

أنا كنت معترضة نسمى الواد عباس على أسم باباك

بس بجد دلوقتى أنا موافقة يا حودة

سمية عباس ومش مهم هبقى أم عباس

أنا ممكن أعمل أى شئ عشانك

والله أى حاجة

ونفسى عباس يجى بسرعة جدا

صحيح جوازنا بعد شهر واحد

بس حساة بعيد أوى

ياااااااااااااااااااااة أطول شهر هيمر عليا

الساعة فية شهر بجد

مع أننا مشغولين فية جدا بشقتنا ومش لاحقين

بس بجد برضة طويل أوى أوى

أد أية بغير عليك يا حودة بجد

أنا كنت همووووووت يوم الجمعة لما رحت توصل بنت خالتك

مع أنى عارفة أنها متجوزة وعندها عيال

بس بجد أول مرة أحس إن في شئ أسمة غيرة

كنت بضحك على الكلام دة فى الأغانى

ومفهمتوش إلا لما حسيت بية

حسيت بية أوى

أخص عليك يا حودة كدة تعمل فيا كدة

أنا قعدت أكل فى نفسى وأعيط طول الليل

بلاش تعمل كدة تانى وحياة عباس الصغير

أنا بغير عليك أوى مع أنى متأكدة من إخلاصك

عارف هههههههه

أنا بحبك برضة لما بتغير عليا

بموت فى نظرة عنيك وأنت غيران عليا كدة

نظرة جميلة أوى بتموتنى من الفرحة

بحبك وأنت حمش كدة وشاكمنى يا حودة ومدينى على دماغى

هههههههههههههههه بلاش تتمرع يعنى

قصدى لما بتدينى على دماغى فى الغيرة

بموت فى نظرتك وشخطك يا حودة وأنت بتزعق لى على لبس مش عاجبك

وبحسها وأنت خايف عليا من عيون الناس

حتى وأنا راكبة فى العربية جمبك وحد بص لى من عربية تانية

بحس أنك هتاكلة يا حودة

ولا لما الطرحة بتطير وأنت سايق بسرعة

بحسك هتاكلنى عشان شعرى ورقبتى هيبانوا أدام الناس

أد أية أحساس جميل

عشان كدة بسيبها تطير هههههههههههههههههه


بجد بحبك يا محمود

بحبك بحبك بحبك بحبك

بحبااااااااااااااااااااااااااااك

ربنا يخليك ليا وميحرمناش من بعض أبدا

وتدوم علينا سعادتنا

ويقدرنى ربنا أقدر أسعدك فى حياتنا الجاية مع بعض

ويخلص الشهر دة بسرعة بقى

والله العظيم بحبك أووىىىىىىىى

يا أبو عباس

2008/05/15

ماتزوئينى ياماما أوام يا ماما

أنا بجد سعيدة جدا لما أكتشفت أنكم مش نسيتونى

وفرحتوا بيا لما قررت أرجع

بجد مقدار سعادتى لا يوصف

وزى ما وعدتكم دى بعض صور خطوبتى أنا ومحمود حبيب قلبى

والباقى بإذن الله هعملة أسكانر وهنزلة قريب

أدعوا لى وأنتظروا منى بجد أحلى بوستات

بجد بحبكم

وهفضل على طول معاكم

لأنى بجد عشقتكم وعشقت عالم التدوين

دعواتكم








2008/05/14

وهتجوز .. هتجوززززززززز



وهتجوز

هتجوزززززززززز

لقانى ماشية مشى ورايا

قال لازم يعيش معايا

عارفين قالى أية؟

أيةةةةةةةةةةةةة؟

بعد إذن سيادتك

أنا معجب بسعادتك

ممكن أكلم طنط

يمكن ربنا يهدينى وأكمل نص دينى

وأبطل أتنطط

هتجوزززز

هتجوززززززززززززز

...............


أية دة أنا داخلة أغنى ولا أية

يووووووووووووووو

كنت هنسى

أنا داخلة النهاردة عشان أقدم أعتذار

مش عارفة أقدمة ليكم ولا لنفسى ولا لمدونتى

أقولكم

هقدمة لكل دة

بجد حاولت أبعد عن عالم التدوين ومعرفتش

مقدرتش

أحساس كدة زى السمكة لما تخرج من المية

أحساس كدة لما ميكنش الهوا فية أكسجين

حسيت أنى بجد هموت

والله العظيم كنت هموووووووووووووت

حسيت إن جوايا حاجات كتير لسة عاوزة عاوزة أقولها وأحكيها

حسيت أنى بحبكم كلكم أوىىى

حسيت أنى بنتى المدونة بحبها أوىىىىىىىىى

ولحبايب قلبى إللى سألونى عن سبب بعدى

هجاوبهم

طبعا كلكم عارفين أنى أتخطبت

وخطيبى وحبيب قلبى محمود مكنش عارف يعنى أية تدوين فمكنش موافق

بس أنا فضلت وراة لحد ما وافق وعرف وأقتنع

وعرف إن التدوين دة شئ جميل ومفيد

وقريب هخلية يدون كمان

وهيعمل مدونة بقت فتة

ههههههههههههههههههه

أشمعنى أنا يعنى بقت سلطة

ههههههههههههههههههههه

يالا خلوها سلطة بقى

هههههههههههههه

بس المشكلة أنى قريب جدا هفقد لقب مروة الزارع

وهبقى مروة محمود

مش حلو برضة ولا أية

عالعموم مروة محمود .. مروة محمود بس نعيش

ههههههههههههه

بجد وحشتونى جدا

وسعادتى النهاردة والأيام دى مزدوجة

لرجوعى للتدوين

ولأنى عايشة أجمل قصة حب بجد مع خطيبى وحبيب قلبى محمود

إللى بجد حاسة أنة الملاك إللى ربنا بعتهولى من السما

وبتمنى أعيش معاة أجمل أيام العمر

ويفضل حنين معايا كدة على طول

أدعولى بقى

وبإذن الله بكرة أو بعدة بالكتير هنزل بكل صور الخطوبة هنا عالمدونة

بجد طالعين فيها مزز

مززز وأوززز بجددددددددد

حاجة كدة أكسلوسف على المدونة

مززز ياخواتشى مززززززززززززز

ههههههههههههههههههههه

ومحدش يروح يشوف الصورة إللى حططهالى خالو العسل أحمد الصباغ

لأنة مطلعنا خلف الأسوار أو أبحث مع الشرطة

هههههههههههههههههههههههههه

معلش نردهالة يوم فرحة بإذن الله بكام صورة للتنوية عن المفقودين

ههههههههههههههههههههههههههه

بجد وحشتونى وأنتظروا بوستاتى الجاية

أنتظروا عودة مروة الزارع

عودة الجبابرة يعنى

وحشتونىىىىىىىىىىىىى

2008/04/11

أذكرونى

دخلت النهاردة وأنا ناوية أحذف المدونتين بتوعى

بعد تفكير كبير

بس بجد مقدرتش

معرفتش

حسيت بجد أنهم بقوا جزء منى

حسيتهم ولادى

وأد أية كانوا بيعبروا عنى

حسيت بمدى صدقى ونيتى الكويسة فيهم

فعدلت قرارى بعد فشل محاولتى

و أخيرا قررت أقفلهم للأبد

هسيبهم ذكرى

يمكن يفكرونى فى يوم بمروة الزارع

وكنت عاوزة أقولكم

بجد حبيتكم كلكم

عشقت عالم التدوين والمدونين

بجد حسيتكم

أتعلمت منكم كتير

كان نفسى أفضل معاكم

كان نفسى أستمر مروة الزارع

بس مش كل حاجة نفسنا فيها بنعملها

وساعات الظروف بتكون أقوى مننا

وبجد حاجات كتير ممكن تمنعنا

من كل حاجة عاوزينها

كل حاجة بنتمناها

حتى يفضل أسمنا أسمنا

وملامحنا ملامحنا

كتير ممكن نفقد دعامتنا فى الحياة

كتير ممكن تقسم قشة ظهر بعير

كتير ممكن نمشى فى طريق مرغمين

أو نغادر طريق برضة مرغمين

مرغمين بجد

كان جوايا حاجات كتير كنت عاوزة أقولها

كان جوايا أفكار حلوة كتير كان نفسى أطلعها للنور

كان جوايا حب كبير ومشاعر كتير

لناس كتير كان نفسى يحسوها

بجد غصب عنى

بشكر كل الناس اللى حبتها وحبونى

اللى قابلتهم واللى مقابلتهمش

كل اللى حسيتهم

كل اللى أتعلمت منهم حاجات حلوة كتير

بجد حبتكم أوى

وبجد علمتوا فى مروة الزارع أوى

وبوعدكم

لو فى يوم أفتكرت مروة الزارع

أكيد هفتكركم

وهفتكر حبكم