أنا عاوزة أتجوز ميكانيكى

كل يوم بركب ميكروباص طبعا

ومين فينا مبيركبش ميكروباص

أو حتى خاض التجربة المريرة دى

أنا حاسة بيكوا والله لأنى متنيلة على عينى وكل يوم فى الحرب دى

وكل يوم بشوف أشخاص غريبة وبتبهدل أخر بهدلة

وبقول دة أسود يوم فى حياتى الميكروباصية

وللأسف تانى يوم بيجى أسود منة

ما تيجوا أعيشكم يوم معايا ونشوف الناس دى بتعمل ايه

لما بركب كل يوم بركب الصبح من ميدان المطرية

وما أدراك ماهو ميدان المطرية

يكيفيكم شرها

المهم

أول ما بوصل الميدان بلاقى الناس واقفة زى الرز لدرجة أن الرؤية ببتعثر

وكل يوم بقول أنا هاجى بدرى قبلهم وكل ما باجى بدرى بلاقيهم هناك

لدرجة أنى حاسة أنا بيبيتوا من أمبارح أصلا وتلاقيهم لسة واقفين هناك لحد دلوقتى ياعينى

عارفين انا ساعات كنت بحلم اتجوز سواق مكروباص عشان اعرف اركب

اكيد هيحجزلى مكان

طب عجلاتى طيب

ميكانيكى حتى

المهم

وبعد ما بوصل وبشوف منظر كل يوم بتاع التكدس الميكروباظى

وبعد ما أصاب بإحباط وعتة مصاب بفوبيا الميكروباصات

بحاول أفوق وأركز إزاى أنط على أول ميكروباص جاى

وتلاقى ياخويا الميكروباص من دول جة والناس تهجم هجوم الشعب على السلع المدعمة

وإللى يطلع من الشباك وإللى ينط وحاجات غريبة

وبرضوا مبركبش

ويفوت الوقت وأنا فى معركة كيف أصعد للمكروباص بأى خسائر ممكنة

مش هطول عليكوا

بعد حرب عارمة بقدر أدخل الميكروباص مع قدر من الإصابات والردود

والردح والشتيمة أحيانا

والميكروباص فى ثانية يبقى علبة سردين

لدرجة إن ممكن حد معدى ميخدش بالة من إن دة كان ميكروباص أصلا

كتلة أدمية متحركة محشوة بالميكروباص وبداخل الحشوة أدميين أخرين

هو دة الوصف العلمى الدقيق للموضوع

ما علينا

بعد ما الميكروباص يتملى جوة وبرة وعلى الأكسدام

وكلة وميبقاش فية حاجة تدل إن دة ميكروباص زى ما وضحت

يركب التباع على طرف الباب ويقول الأجرة موحدة يا حضرات

إللى راكب على الأكسدام يحضر أجرتة

حضر أجرتك يانجم

وقبل ما نتحرك وأحنا لسة بنقول ياهادى

نخش فى المعركة الثانية

الأجرة

الأجرة جنية يا كابتن

وتيجيلة واحدة تديلة خمسين قرش يقولها

مفيش نوووووووووص جنية يا أنيييييسسسسسسة

عارفين طريق نطق التباع للكلام جميلة جدا بتعجبنى

ترد علية الأنسة تقولوا أنا هنزل بعد الكبرى على طول

يقولها مالناش فية يأنييييسسسسسسسة فكك الأجرة جنييييييييييية

وبعد لم الأجرة والشتايم والخناق والباقى ياسطى

والنووووووووووووص جنية دة مقطع غيرهولى يا حلاوة

بنتكل على الله

ويركب السواق

والمصيبة كل ما أركب مع سواق يطلع أغرب من إللى قبلة

أشكال غريبة فعلا وعندهم قانون أساسى للتأهيل للسواقة

هو أن لاتقل عدد ضربات المطاوى المسماة بالبشل عن 3 ضربات

وكلما زاد عدد البشل زادت كفاءة السائق

مطولش عليكوا

اول ما طلع البيه

واحنا فى وسط زحمه المطرية

راح ضرب غرزه من اللى بالى بالك فى وسط العربيات

خلى حوالى 4 او 5 عربيات عملوا فرامل فجأه

وراح واحد منهم مطلع دماغه وزعق وشاتم شتايم من إللى بالى بالك

راح السواق الجميل بتاعنا راح سايب الدركسيون كله ومطلع دماغه من الشباك وواقف

وبزعيق ..ما بتعرفوش تسوقوا بتسوقوا ليه... احنا طبعا شفنا المنظر

البيه ساب الدركسيون ..وبيبص ورا ..ومنفعل بسيل شتايم جامد فى وسط الزحمه

وقلبنا وقع فى رجلنا

نحاول بقه نقول له يا عم خش من الشباك..العربيه ماشيه

وده ولا هنا...لحد ما واحد من الركاب فهم الدنيا ماشيه ازاى قال له يا عم خش وسيبك

ده سواق حمار ..خلينا نلحق نوصل عشان تلحق تعملك عجلة تانية

ولتوضيح اللغة الميكروباظية عجلة = دور تانى

أتعلموا لغة بقى

راح الراجل خش بعد ما كان مدلدل نصه من الشباك

وقعد يزعق ويقول ..عندك حق يا نجم ..دول ناس بهايم

مش عارف بياخدوا الرخص ازاى دول

بصراحه ده اللى بفهمة من الكلام... بقيه الكلام ماركه

دول لازم ينتشتمروس

ما عندهمش بسينروكا..عايزين نتسمرنئوس عال سرتنتمونى

طبعا فضل خمس دقايق يقول كلام ما فهمتهوش

قلت جايز ألدغ ولا حاجها

وطلعنا من الموقف

وطبعا شوفنا حركات بهلوانية فظيعة

وإزاى تتسابق مع إللى جمبك رغم إن الطريق أصلا واقف

هوب يدوس فرامل وبعدها بنزين وبعدها فرامل

والناس بقى يايعينى بما فيهم أنا عمالين كل شوية نتشقلب ونط هوب فوق هوب تحت

ياعم أرحمنا إحنا بنى أدمين راكبين معاك

راح راجل سأل التباع...هو شارب حاجه

لا والله ..هى سيجاره الحشيش بس أستمورننج إصتباحة يعنى

الراجل قال له بس ...بسيطه ..افتكرته شارب حاجه

المصيبه ان التباع بيتكلم بكل وضوح...والراجل بيرد بكل برود

الظاهر انى مش عايشة فى البلد دى

السواق ماشى بينططنا جوة المدعوء الميكروباص دة

وعمال برضة يدى غرز فى وسط العربيات

والاقى بقه كل الميكروباص بالناس اللى فيه..اللى بيقول الشهادتين

واللى بيقرا قرأن...واللى بيقول للتانى ..قلت لك تعالى صلى معايا الفجر وما ردتش تيجى

الظاهر ان التباع حس بالقلق ...حب يهدى السواق

راح مطلع له شريط..وقال له حطلنا ده

وروق كده قال له السواق ..مش سامع كل شويه يقولوا هدى

عايزين نلحق فيصل كمان نصف ساعه...يا نهار اسود...عايز يوصلنا ..ويرجع

ويروح فيصل فى نصف ساعه

انا قلت من الأول الراجل ده فى برج لاسع فى مخه ربنا يستر علينا

الشريط اشتغل .. ولا أفاجئ بكوكتيل الأغانى الغريب

واحد قاعد يغنى العنب العنب العنب...احمر ودمه خفيف

ومع العنب السواق بقه فى دنيا تانيه

قاعد يترقص فى

وكل ما تيجى العنب العنب العنب..الاقى السواق شال ايده من عالدركسيون وبيهزهم

ويميل ورا عالكرسى ..كأنه بيميل على راقصه

الناس ابتدت تتكلم ..الراجل ده شكله مجنون يا جدعان

بص بيرقص ازاى ...واحد تانى ذكى بيقول له ..ويا ريت بيعرف يرقص

واحد يقول للتانى..بس دماغه عاليه قوى...ابن اللذينه واخد صنف نضيف مش عارفة جايبة منين

واحد تانى...ايه اللى ركبنى انهارده...ادى اخره الشغل وإللى بيشتغلوة

الوقت ده 2 من الركاب قالوا حاسب ياسطى

ودة ولا هنا مندمج مع العنب

حاسب ياسطى وفجأة الكل فى نفس واحد حاسب ياسطى عاوزين ننزل

لاموأخدة ياجماعة مسمعتش وراح منزلهم فى وسط الطريق طبعا

وهما نازلين بقه...ده راجل ابن ستين فى سبعين.. ربنا يكون فى عونكوا

واحد من الراكبين ..يا بختكوا ..نزلتوا خلاص

طلع التباع ركب جنب السواق

الأغنية أتغيرت

والاقى اغنيه تانيه

وكعبوا كعبوا

والاقى 2 من الركاب .. بيردوا ... كعبوووووووووووو

حبيبى وانا الاعبه .... كعبوووووووووووو

الناس اندمجت قوى .. ونسيوا الدنيا كلها

وانا العبه ....اوباااااااااااا يا كعبوا كعبوا .... يا واد ما تلعبووووو

كعبووووووووووو

بصراحه انا لحد كده وكنت جبت جاز

راكبة ميكروباص مجانين

السواق محشش ... والتباع مش فى دماغه

والناس نازله ترقص والراجل اللى جنبى اندمج جدا فى اغنيه

لدرجه انه كان بيمد بوزه قوى ... وهو بيقول كعبه

عايش الاغنيه يا جماعه

الحب عايز الملاغيه .... راح قال لى فين الحنيه.. يا كعبوا كعبوووووو... كعبووووووو

يلا بينا نلاعبه

وكل ده والسواق سايب الدركسيون وقاعد يهز فى كتافه

يطلع لأدام .. ويرجع لورا فى الكرسى

والناس نسيت اللى بيحصل مع كعبو

وتحول الميكروباص لملحمه كعبوا خمس دقايق

خلصت كعبوا... والاقى هيصه

مش هيصه يعنى دوشه .. هوه بصراحة كله دوشه

بس دى اغنيه اسمها كده لا مؤاخذه والميكروباص اتقلب فعلا هيصه

وهيصه ..هيصصصصصصصه...الشاب بيرقص عالتربيزه والفلوس نازله عليه

والركاب بقه من وره ...يردوا ...هيصصصصصصصصصه

طبعا فى وسط الملحمات دى ...انا بحس انى جاهلة ... مش مسايرة العصر

الركاب كلهم حافظين الاغانى ..وانا جاهلة مع أنى كل يوم بسمعها ظلما وعدوانا

الظاهر معنديش حس فنى ...لا عارفة ارد واقول كعبوا

ولا حتى هيصصصصصصصصصه

ولقيت الراجل اللى جنبى بيبص لى .. بازبهلال

عايز يقولى ما بترديش ليه ورا الاغنيه

رحت باصة له بكل براءه وقلت له هييييييييييييييييصه

فى نصف الاغنيه الواد التباع كان نايم على نفسه

السواق بقه مندمج ولمح ده مش بيغنى

اول ما خلصت الفلوس نازله عليه

والاقى ده رقع التباع حته قفا..من اللى قلبك يحبه

لقيت التباع صحى فجأه وهو بيقول هيييييييصه

الحمد لله وصلنا بسلامه ..بس السواق نزلنا على بعد 500متر من الموقف

وقالنا معلش يا جماعه...اصل الظابط واقف

ولازم الف وارجع قبل ما اتمسك

طبعا الناس نزلت من الميكروباص ...وهى بتقول لبعض ..يا عم انزل مش مشكله

المهم اننا وصلنا ..واللى يقول للتانى ..حمد الله عالسلامه

ده احنا انكتب لنا عمر جديد يا راجل

وانا نزلت وخلاص الدمعة هتفر من عينى

على حالنا إزاى بقى

وياترى هنستمر كدة لحد أمتى