الوضع : لسة صاحية من النوم منكوشة الشعر وعنيا معمصة
وهدومى مفعكشة عالأخر ومتأخرة على الشغل ومخنوقة ونفسى أكل سندوتش ديناميت فول وطعمية وبتنجان وبيض
الحدث : فتحت التلفزيون وقولت أتفرج على حاجة كدة على السريع وفتحت أحدى قنوات الأفتكاسات الدينية الحديثة
ولاقيت واحدة على الهاتف بتسأل فضيلة الشيخ وبتقولة
يافضيلة الشيخ أنا واحدة متجوزة ومرتبطة بواحد متجوز ياترى حرام ولا حلال
إجابة فضيلة الشيخ : ورحمة فراخ ستى ما فهمت منها حاجة كل اللى أنا فهماة أنة رد فى حاجة تانية خالص
وطلع إبن عم مرات خال المخرج فى الاخر هو اللى غلطان
الإجابة المفتكسة : والله يابنتى لو أسمة محمد يبقى حلال ولو أسمة توم أو جاك يبقى إبن كلب واطى حرام
إجابتى أنا : أوبجيكشن بالعربى
(بالمطراوى بالأصح)
......................................................................
الوضع : قاعدة بحك وشى بحجر الحمام عشان ابيض يوم الجمعة بعد حمومة الشهر يعنى
الحدث : فى برنامج مصيبة شلباية سألت احدى الفتيات المستهبلات عبر الهاتف
أنا بحبك موت موت موت موت وكنت عاوزة اسألك سؤال
إزاى أبيض عشان لما ألبس البكينى فى الصيف والصيف داخل وكل سنة وانتى طيبة
ابقى مزة كدة على الشط
إجابة مصيبة شلباية : لية يابنتى تبيضى دا السمار موضة الأيام دى زيى كدة وهتبقى فى المايوة مزة جداااا
الإجابة المفتكسة : ولية المايوة يا حبيبتى خليها ملط احسن دى حتى موضة زيى كدة
إجابتى أنا : أوبجيكشن بالعربى
(بالمطراوى بالأصح)
.....................................................
الوضع : كنت لسة راجعة من الشغل وكابس عليا النوم وعمالة أتاوب ومش قادرة خالص
قلت أقلب تقليبة كدة فى المفسديون قبل ما أنام
الحدث : لاقيت الرجل بتاع تفسر الأحلام وواحدة بتتصل بية
أزيك يا فضيلة الشيخ والله وحشتنا جدا وانا مش مصدقة نفسى أنا هنتحر من الفرحة
أناا حاسة أنى مش قادرة من الصدمة
أنا حلمت إمبارح حلم فظيع فظيع فظيع
حلمت أنى بعمل طشة ملوخية وبتعمل طشششششششششششش
إجابة الشيخ مفسر البتنجان : والله أعتقد إن معناها خير كثير جاى ليكى فى الطريق
بإذن الله
الإجابة المفتكسة : والله يابنتى لازم تحددى هيا ملوخية ناشفة ولا خضرا ومعمولة على فراخ ولا لحمة ولا ارانب ولا قرديحى
إجابتى أنا : أوبجيكشن بالعربى
(بالمطراوى بالأصح)
42 comments:
ههههههههههههههههههههههه
انا سبقتك يا ميرو وكتبت بوست شبه ده كدة
اسمه حدث فى التلفزيون
هتلاقيه موجود فى ارشيف شهر فبراير
ابقى روحى اقريه
بس عجبتنى اوبجيكشن دى
دى كانت كلمتى اللى انا مشهورة بيها ايام ثانوى
يااااااااه
انا ماكنتش اعرف ان الكلمة دى لسة شغالة لحد دلوقتى
تحياتى يا ميرو
ماتنسيش تقرى البوست اللى بقولك عليه
حدث فى التلفزيون
فى ارشيف شهر فبراير
سلام
خيخة
اول تعليق
:)
احيه بالعربي
(بالاسكندرانى بالاصح)
يخرب بيت ام امينه شلبايه باكرهها يا ناس باكرهها ازاى ديه كانت ميس ايجيبت يعني مش فاهمه والمصحف مرات عم احمد البواب احلى منها مليون مره لا ده عم احمد شخصيا احلى منها
بصي يا بنتى انا مش باتفرج على حاجه عربي مفيش احلى من السيمبسون وجرايز اناتومى
:)
ههههههه والله شر البليه مايضحك..كتاباتك هايله اول مره ازورك بس اكيد هاجى تانى كتير..عندك حق بينى وبينك انا صحتى على قدى ومبقتش بشوف التلفزيون كتير عشان المراره بتاع الانا ..مفروض نعمل مشروع للبنات لللاستعداد للصيف والمايوهات هههههه مش عارفه محسسنى اننا فاليونان مش فمصر بتوع المفسديون دول..للامام ربنا يوفقك ومنتظره زيارتك تشرفينى http://www.black-roses-candles.blogspot.com/
السديكة العزيزة ميروة
اوبجيكششششششششششن
ورحمة فراخ ستى انا هتجنن من البرامج دى
بالذات الشيخ الطويل العريض
اللى جاى من بيتهم
يفسر طشة الملوخية والهدهد اليتيم
وزى ما قالت لك نسرين
عم احمد البواب اجمل من امينة شلباية
واحب اضيف ان الباب شخصيا احلى منها
تحياتى
احمممممممممد
بت انتى انت هتستعبطى ولا ايه انتى مالك ومال الاختراع الهزعبلى ده
وبعدين تعلاى نتكلم جد والله فيه شيوخ كويسين وبعدين با مروة ما تقفلى تليفويزن الجيران انتى مالك ومالهم بتتفرجى عندهم ليه ايه الرخامه دى هههههههههههههههههه
وعهد الله التلفزيون والعلام ده
هيموتنا منقوطين مشلولين
ده مش ممكن
ده مفيش مدون او مدونه دلوقت
الا اما كتب عن العلام والتلفزيون والعلانات والمسلسلات والبرمج
يالهوىىىىىىى
الصديقة العزيزة
كويس ان كل مشاهداتك للاختراع ده كانت سريعة لان الفرجة عليه لوقت طويل تؤدي الى الاصابة بأمراض نقص العقل و زيادة البلاهة
و ما اكثر الفتاوي الجميلة دي و الغباء اللي ماشوفتش زيه سواء على اللي بيسأل او اللي بيجاوب
معلش تصحيح بس طشة الملوخية في الحلم معناها رنة موبايل جديدة
و اكيد مليون اوبجيكشن
اوبجكشن بالمطرواى يغنى ايه وهو فين العلام العربى عموما يا اما قنوات اغانى وكليبات ومزز يا اما قنوات دينه بتعمل من مدعى التين شيوخ وبفنوسى يا 000000 متفرجين
عاوز اضم الاوبجكشن بتاعى الى الاوبجكشن بتاعك بكل لغات العالم
تحياتى
هههههههههههه
نقي قنوات كويسة
أقولك خدي لك حمام دم من اللي بيتكب في الجزيرة
:(
بجد بوست جميل وياريت كنتى تعلقى على كل البرامج لان اسلوبك حلو اوى
أحييكى
انا اعترض
بس على الرسم
اللى مكتوب عليه المشاهد المصرى
وده لانى ساعات بنطس فى عقلى وبشاهد التليفزيون
يبقى بعد كده
هنهق ؟
سلامو عليكو
على فكرة انتي غلطانة جيييدداااان
الراجل المفتي
كتر ألف خيره
قام من النوم و ركب الدقن و يا عالم ركب اييه لحد المحطة اللي بيذيعوا منها .. كل ده عشان ينقذ الامة و يجاوب باستنارة عن الفرق الجوهري بين علاقة الزوجة اللي مطلعتش حرام .. و في الىخر جزاءه بوست من سعادتك بالشكل ده؟ .. اخص
هههههههههههههههههه
هههههههههههههههههه
حدثي عن شلباية ولا حرج
الولية دي .. بجد .. موهوبة
لازم اتفرس كل لما اشوفها .. ابداع برضه
:)
ممكن يا مروه تغيرى حاجه صغيره فى الصوره ؟
يعنى غيرى المشاهد المصرى بدل الحمار خليه خروووف
كده هتبقى احلى وتدى معنى احلى
لاء بقه انا لسه مسجل تعليقى هنا واجى ملقهوش وبعدين يلا نعلق تانى
انا بطلب منك يامروه انك تغيرى شئ بسيط فى الصوره وهو انك تغيرى المشاهد المصرى بدل الحمار خروف
اعتقد انه هيدى معنى تانى وجميل
مدونتك جميلة يا مروة ,, انا اول مرة ازورها
كمان انا ملاحظ ان الكل بيحقد على امينة شلباية .. حقد البنات دا .. عشان هى احلى منكم وماحدش عارف يبقا زيها
التليفزيون بقى شئ بشع ,, فكرتونى بواحد صاحبى عمل مدونة مخصوص عشان يقاوم التليفزيون
دا عنوان البوست بتاعه
http://no-more-tv.blogspot.com/2008/02/blog-post.html
مروه
انا علقت هنا مرتين قبل كدهوالتعليق منزلش عايزك تغيرى صورة المشاهد المصرى ويتغير الى خرووف
ههههههههههههههههه الكريكاتر دة تحفة يخرب مطنك يا رورو اية العظمة دى بس على فكرة من غير تلفزيون مش كنا هنلاقى حاجة افقع مرارتنا اكتر .. بشكرك جدا على البوست دة وعلى فكرة انا ملاحظ تقدم فى كتاباتك وافكارك ويارب كدة دايما
برافوووووووووو
بسم الله الرحمن الرحيم
بالنسبة للحالة الاولى
المشكلة فى الانهزام الفكرى لبعض المشايخ الى بيطلعوا على التليفزيون , يعنى الجماعة دعاة التغريب والعالمانية قعدوا يهاجموا المشايخ ويقولوا تكفيريين تحريميين تفسيقيين مش عارف عاملين ازاى , فالناس المهتزة عقائديا وعلميا بتنهزم وبيوصل بيها الامر انها تجبن عن حسم امر شديد الوضوح زى اللى قلتيه حضرتك
اما موضوع تفسير الاحلام فكل واحد قرأ كتاب تفسير الاحلام لأبن سيرين ( وللعلم هو كتاب لا يثبت عن ابن سيرين ) عامل فيها سيدنا يوسف وقاعد يفسر .
ربنا يهدى الجميع .
افتكاسة من الآخر بس ياريت الملوخية تكون بالأرانب
ههههههههههههههههههه
اوبجيكشن
الحمد لله انا مبتفرجش غير على برامج قليلة فى التلفزيون والا كان جرالى اللى جرالك
وطلعت اجرى فى الشارع
واقول اوبجيكشششششششششششششششششششششششششششششن
لو ملوخيه خضرا وعلى شوربة فراخ
يبقى اعزمينىىىىىىىى :)
ويكون الحلو مهلبيه :)
بصراحة الهبل اللى من النوع دة بقى ناشع قوى فى البرامج المتخلفة بتاعتنا .. و اللى يغيظ إن البرامج دى ليها جمهور و ناس مهتمين بيستنوا البرنامج من الأسبوع للأسبوع .. عشان كدة أحب أعبر عن أوبجكشنى على الموضوع بالعبارات الآتية اللى أنا مسميها "العند أميات"ا
عند أمه يا أدهم .. عند أمه
عند أم ترتر
عند أم ألمظ
عند أم بودرة
روح لها يااااد (الضمير هنما عائد على أى أم)ا
و فى الآخر أحب أقول: يخرب بيت أم دى برامج
رائع قوى
بطلنا نتفرج على التليفزيون
كفاية ما هى بقت سلطة
تحياتى ليكى ورائعة المدونة طبعا
يا مروة يا بنتي .. علشان تعزمي نفسك على مشاهدة خاطفة للمفسديون انتي محتاجة حزمة كاملة من الاوبجكشنز
الفضاء اصبح مفتوح .. هنعمل ايه
خللي اللي يفتكس يفتكس
وربنا يهدي
تحياتي
يا مروة يا بنتي .. علشان تعزمي نفسك على مشاهدة خاطفة للمفسديون انتي محتاجة حزمة كاملة من الاوبجكشنز
الفضاء اصبح مفتوح .. هنعمل ايه
خللي اللي يفتكس يفتكس
وربنا يهدي
تحياتي
ههههه
والله تعبيرك صح هو المفسيديون
عامل يفسد فى عقول الناس
حلو قوى قصة الموزه بتاعت الصيف هى الناس دى مالهاش اهل تقولها كده عيب
ولا المتزوجه اللى بتحب واحد متجوز
يعنى هو التانى راجل وجوزها لالالا
الحمد لله انا معظم قعدتى على الكمبيوتر مش التلفيزيون
قليل قوى لما اقعد عليه اسمع البراماج وخلاص
تحياتى ولاء
أوبجكشن من هنا للصبح يا حاجة
أوبجكشن أوبجكشن أوبجكشن
يه بس الدماغ دي, ده دماغ ولادي و الافيهات عندك عالية قوي
مدونتك تحفة
و رسوماتك تحفة
وتعليقات فطستني على روحك من الضحك
كان نفسي في البوست ده من زمان بجد
انتي جبتي من الاخر
مروه
ازيك
يخرب عقلك ...مروه الزارع هي مروه الزارع باسلوبها الساخر الساحر الجميل
:) :)
تحياتي ليكي يا مروه وألف تقدير لشخصك الكريم
الحدث
صحيت من النوم لقيت النت في البيت مفصول
روحت جارى على سيبر
لقيت مدّونة مروة الزارع
وؤولت أقول بس مساءوا زى الفل علشان هاتلاقيني هنا كل يوم بوستك زى السكر ... وسلام بقي
حمادة زيدان
أنا مش عارف علقت ومظهرش لعلا المانع خير ... بس هو انتى كنت مشغلة قنوات إيهه بئي علشان مجابهمش أبداً
والله القنوات دلؤتي نصها أغاني ونصها دين والواحد مش عارف يروح الجنة مع الناس ولا يدخل النار مع ميلودي
ولا ممكن نخلينا عالأرض ونشوف ال mbcأهى دى ممكن تخليكي عايشة
دمك زى العسل
حمادة زيدان
الجميل في الأمر
انك حقاً اعترضتي
:)
مجاوبتيش على سوالى اوبجيكنش بالمطرواى يعنى ايه
انتى زعلانة منا ولا ايه
فينك؟
عزيزتى
زيارتى الأولى لك,, أنا يلفت نظرى جدا خفة الدم لأن ممكن تشّربى العلقم وهو متغلف بابتسامة ,احييك على خفة دمك وقدرتك على التغليف ,,برافو عليكى
هق هق هق هق هق هق
لالالا شديدة
وعلي فكرة هوة دة الي بيحصل بالظبط
بوست هايل
كوميدي وهادف
عبدالرحمن
الكاركتير معبر جدا
والموضوع هايل
لكن أعتقد أن الانسان عندما يبحث عن شيء سيجده
وستبتعد عنه تلاقائيا الاشياء الاخرى
سواء في التلفاز أو في غيره
فمن يريد الخير سيجد الخير دائما امامه
ومن يريد غيره سيجد غيره
محبتي
تحياتي
ضحكت...و شر البلية ما يضحك.
يا مروة... العديد من قنوات التليفزيون تجيب تخلف عقلي.....لكن هناك ايضا قنوات جميلة مثل الجزيرة الوثائقيه...و ديسكفري..قناة المحور.
ومثل ما قالت Appy لا تتفرجي عند الجيران ههههههه.
نسأل الله ان يجيرنا و يقينا و يكفينا
و الا يؤاخذنا بما فعل السفهاء منا.
تحياتي و تقديري و دمت بالف خير.
مروه
العزيزة الغالية
كل الشكر لك على ما قدمت فى هذا البوست الجميل والظريف
سعيد بزيارتى الاولى لمدونتك وان شاء الله لن تكون الاخيرة
اختى ادعوك لزيارة مدونة
اتحاد المدونيين المصريين
لتتعرفى على ما ننوى القيام به من اجل المدونيين ولسهولة الوصول يمكنك ذلك من رابط الاتحاد بمدونتى ولك كل الشكر ..فى انتظار اراؤكم لتطوير العمل ونسعد بطلب العضوية
هيه اوبجيكشن بأه معناها بالأصح طيب والله معلومه مفيده
طبعاً بتجاهل الاوضاع الليس هيه طبيعيه لأي مصري وبتجاهل اول اتنين لإني مضحكتش عليهم مش عارف ليه لكن بصراحه التالت هوه اللي مت على نفسي من الضحك فيه اصل الراجل بتاع تفسير الاحلام ده بيموتني من الضحك بصراحه اصلي كنت في مرة قاعد قلبت لقيت واحده بتسأله انا بقالي اكتر من سنة محلمتش هل ده طبيعي
قالها ده معناه ان ربنا حاميكي وحافظك واكيد في خير كبير في انتظارك فبصراحه راجل كله خير وبركه وثقافه ربنا ياخده ويخلصنا من الكدابين امثاله في الارض
تحياتي
Post a Comment