2009/11/14

بلا وكسة

أنا لسة عارفة بموضوع ماتش مصر والجزائر دة بس امبارح
عبيطة مش كدة
اكيد ناس كتير شايفانى مختلة عقليا دة بالنسبة لكتير أهم حدث فى التاريخ
والله أنا ما كنت عارفة حاجة
أصل أنا هنا عايشة فى مية البطيخ
وبما أنى لسة مدخلة النت فى بيتى الجديد من أسبوع بس
فحياتى أتقسمت إللى ما قبل النت وما بعد انت على وزن ماقبل وبعد التاريخ
كانت حياتى مفيهاش غير بانوراما دراما وروتانا سينما وأحيانا إم بى سى تو
وخصوصا أنى عايشة فى التجوع الخامس
يوووووو قصدى التجمع الخامس ونتكلم فى موضع التجوع الخامس دة بعدين
المهم نرجع لموضوع البوست
إلا يا خويا أفاجأ بالدنيا قايمة مش قاعدة
ماتش مصر والجزائر اللى هو النهاردة بالليل
وقال أية كاس العالم
سرحت مع نفسى كدة
أنا أصلى عندى عقدة قديمة من الماتشات أصلا
رجعت بذاكرتى لبابا الله يرحمة
وأحنا صغيرين كان بابا بيحب الماتش جدا
أى ماتش حتى لو فريق اللهو الخفى مع فريق عفريت الظلام
وياسلام لما الأهلى والزمالك يلعبوا
كان بيبقى يومنا مدووووووووحس لما الزمالك تتغلب
وطبعا كان بيبقى مدوحس على طول هههههههههههه
وياسلام بقى لو غلب
كل اللى نفسنا فية كان بيجى وأطلب وأتمنى يا عم كأننا لاقينا خاتم سليمان
وبابا كان بقى يقعد يتفرج على الماتش
وأحنا نفسنا نشوف مسلسل الساعة 7 أو كارتون مازنجر على القناة التالتة
وأعيط لة والنبى يا بابا عاوزة مازنجر عااااااا
وبابا يقول
غورى يابت من قدامى انا الشياطين بتتنطط فى وشى
شوط يالااااااا شوط
أوباااااااااااااا
شوط يالا يابن (تيييييييت) شووووووط
ومن أيامها كرهت الماتش
كل الموتشا اللى فى الدنيا
ولما كبرت فكرت كدة
هما لية مديين الموضوع كدة أكبر من حجمة
يعنى دلوقتى كل الأفلامانات إللى عاملنها دى لزمتها إية
يعنى هيحصل أية لما مصر تكسب الجزائر
هيحصل أية حتى لو خدت كاس العالم
وحتى لو خدت شفشق العالم مش كاس واحد
اية يعنى
ديون مصر هتتسدد
الناس هتلاقى تأكل عيالها
الموظفين هياكلوا لحمة كل يوم
الشباب هيشتغلوا ويتجوزوا ويخلفوا
مش عارفة والله بلا وكسة
ملحوظة
عارفين أحلى حاجة أية
إن حودة جوزى مبيحبش الماتش ومالوش فى الكورة
أنا فرحانة فرحااانة فرحااانة
نيااااههههاااااااههههاااا

14 comments:

صبرني يارب said...

ميت وكسه وحياتك

بصي فى بلاد زي البلاد الافريقيه مثلا
الكوره شايله اقتصادهم فعلا

الكوره بتجيب لهم دخل كبير بيفرخوا لعيبه ويصدروها لاكبر اندية العالم

احنا بقى مواكيس يا فندم بنصرف على الكوره

بما اننا شعب مرتاااااااااااااح ومش عنده مشاكل فبنصرف على الكوره من دمنا عاااااادي


انا جوزي بيحب الكوره بس مش مجنون زي المجانين دول

يعنى بيشوفها لما ظروفه تسمح

اينعم اول الجواز اتصادمنا شويه لانى من بيت غير كروي بالمره

وهو كان واخد بقى على وضع تااني

بس اتفقنا فى الاخر

اانه احنا الاول وبعدين اي حاجه تاني مش مهم

عموما احنا اصلنا نستاهل الى بيجرلنا

وتحياتي ليكى فى اول زياره

وشكرا على زيارتك يا جميل

hadeir said...

لسه عارفه بالماتش امبارح

ده انتى مش فى الدنيا

الدنيا مقلوبه خالص خالص بسبب النيله الماتش

ده كله بياكل فى كله بسبب الماتش

واللى يغيظك ان سواء احنا او الجزائر اتئهلنا

مفيش دوله فينا هتعدى الادوار التمهيديه

يبقى ليه وجع الراس ده

ليه نعمل بنا وبينهم حرب بارده
على ولا حاجه

ليه نهزئهم عالنت
وليه يشبهونا بالياهود

ما الوقت اللى هنتفرج فيه عالماتش ده ممكن نعمل فيه حاجات افيد

والفلوس بتاعت التذاكر

هيحصل ايه لو اتبرعنا بيها للمحتاجين

اوف
والله حاجه تخنق

بس رغم كل ده انا كنت اول واحده مقهوره لأنى مش هعرف اروح الاستاد

شفتى تناقض كده فى الدنيا :D

خواطر شابة said...

بداية تحية طيبة
تانيا استغربت انك لم تعرفي بالماتش الا امس ده كان حديث الدنيا بقالو اكثر من شهر والدنيا قايمة قاعدة كأنها حرب عايزاك تشوفي اغنية أ؛مد مكي الجديدة عن اللي حصل لو معرفتيش تجبيها ادخلي على مدونة جبهة التهييس الشعبية حتلاقيها هناك
أغنية روعة بجد قالت كل اللي لازم يتقال
تحياتي لك

واحد من العمال said...

السلام عليكم

فعلاً الكوره اليومين دول اللى مبيفهش فيها يبقى مش عارف ايه
أنا زيك مليش فى الكوره وأهلاوى بالكلام وخلاص
وبأسأل على النتيجه وخلاص
لكن اللى مضايقنى العداء بين الفريقين أو الدولتين اللى بيلعبو زى ماتس اليوم كن اللى حيغلب حيرجع لنا القدس وحيحرر لنا فلسطين
أوحش حاجه التعصب فى أى شىء

تحياتى

Desert cat said...

انا شكلى فاتنى كتير اوى فى مدونتك يا مروة اعذرينى بجد الحياة واخدانى اوى الايام دى بتابع بالعافية
بس راجعت كل البوستات اللى فاتتنى واتبسطت اوى لاخبارك الجميلة دى والف الف مبروك على زوجك وعلى انجابك
ويارب يديم عليكى السعادة والحب العمر كله

Desert cat said...

اما موضوع البوست بقى فانا مش اق عند فى الاندهاش والانبهار بحال الشارع المصرى والاحداث اجاية اللى تجيب اكتئاب وتخلى الواحد يبطل يزعل على حد ابدامهما حصل

Maha said...

عجبتني قوي التدوينة دي ومتفقة معاها جدا

اسلوبك حلو ما شاء الله :)

مبسوطة إني دخلت "بقت سلطة"

قطرات من شواطئ الحياة said...

أنا معاكي معاكي في كل كلمة يا مروة
بالذات في جزء:

هيحصل أية لما مصر تكسب الجزائرهيحصل أية حتى لو خدت كاس العالم وحتى لو خدت شفشق العالم مش كاس واحداية يعنى ديون مصر هتتسددالناس هتلاقى تأكل عيالهاالموظفين هياكلوا لحمة كل يوم الشباب هيشتغلوا ويتجوزوا ويخلفوا

هو ده الغكر الصح ربنا يباركلك

yasser esmail said...

بجد مدونه جامده جدا وفيها موضوعات حلوه

تمنياتى بالتوفيق دائما

اقصوصه said...

فعلا

بلا وكسه!

الدنيا واسوتها / جيهان said...

يابنتى خلى الناس تفرح شوى

اهو يروح الاحباط والاكتئاب من قلوبهم ولو يوم

تحياتى

Ibrahimsamir said...

دراسة ماجستير تتناول المدونات المصرية
بعد التحية،اسف للخروج عن مضمون التدوينة فى التعليق أنا اسمى إبراهيم سمير أعمل صحفى بمجلة الإذاعة والتليفزيون وأقوم بعمل رسالة ماجستير تحت عنوان "استخدامات الشباب المصرى للمدونات ومنتديات النقاش الإلكترونى على الإنترنت.. دراسة مسحية" وكما يظهر من عنوان الدراسة أنها تتعلق بالمدونات المصرية والتى ينشئها مدونون مصريون ولقد اخترت المدونة الخاصة بكم لتكون من ضمن المدونات التى يتم تضمينها بالدراسة ليتم دراستها وهناك جزء بالدراسة يتعلق بالقائم بالاتصال وهم المدونون المصريون ولذلك قمت بتصميم استبيان للتعرف على أنماط ودوافع استخدام المدونون المصريون لمدوناتهم واتمنى ملئ استمارة الاستبيان المرفقة مع الرسالة وهى الجزء الأهم بالدراسة واتمنى المساعدة فى دقة الإجابة للأسئلة حرصاً على دقة النتائج. والاستبيان يتكون من مجموعة من الأسئلة المتعددة الاختيارات يقوم المدون باختيار الإجابة الصحيحة وهناك أسئلة يمكن اختيار أكثر من إجابة وهى الأسئلة التى يرفق بها عبارة (يمكن اختيار أكثر من بديل) وهناك أسئلة يمكن أن تضيف الإجابة التى تراها من وجهة نظرك. وبعد الإجابة على الاسئلة تضغط على ايكونة submit.
ولقد ارسلت لك على الايميل الخاص بك الاستبيان ولكن لم يصلى الرد ارجو الدخول على الرابط الخاص بالاستبيان وتجيب عليه وهذا هو الرابط
http://spreadsheets.google.com/viewform?formkey=dHFZMENoU194OGpza0RzRUpaeXRWV1E6MA
ولك منى وافر التحية
إبراهيم سمير
صحفى بمجلة الإذاعة والتليفزيون
تليفونى 0128460141
ibrahimsamir@hotmail.com

جندالرحمن said...

وكسة وكسة ولكن تدل علي مدي تضاءل الشعبين علي ماتش كورة
المفروض ان هناك عقولا تفكر لا عقول تحارب من اجل كورة

جندالرحمن said...

وكسة بجد بدل ما نفكر اهو بنضيع وقتنا