2008/04/11

أذكرونى

دخلت النهاردة وأنا ناوية أحذف المدونتين بتوعى

بعد تفكير كبير

بس بجد مقدرتش

معرفتش

حسيت بجد أنهم بقوا جزء منى

حسيتهم ولادى

وأد أية كانوا بيعبروا عنى

حسيت بمدى صدقى ونيتى الكويسة فيهم

فعدلت قرارى بعد فشل محاولتى

و أخيرا قررت أقفلهم للأبد

هسيبهم ذكرى

يمكن يفكرونى فى يوم بمروة الزارع

وكنت عاوزة أقولكم

بجد حبيتكم كلكم

عشقت عالم التدوين والمدونين

بجد حسيتكم

أتعلمت منكم كتير

كان نفسى أفضل معاكم

كان نفسى أستمر مروة الزارع

بس مش كل حاجة نفسنا فيها بنعملها

وساعات الظروف بتكون أقوى مننا

وبجد حاجات كتير ممكن تمنعنا

من كل حاجة عاوزينها

كل حاجة بنتمناها

حتى يفضل أسمنا أسمنا

وملامحنا ملامحنا

كتير ممكن نفقد دعامتنا فى الحياة

كتير ممكن تقسم قشة ظهر بعير

كتير ممكن نمشى فى طريق مرغمين

أو نغادر طريق برضة مرغمين

مرغمين بجد

كان جوايا حاجات كتير كنت عاوزة أقولها

كان جوايا أفكار حلوة كتير كان نفسى أطلعها للنور

كان جوايا حب كبير ومشاعر كتير

لناس كتير كان نفسى يحسوها

بجد غصب عنى

بشكر كل الناس اللى حبتها وحبونى

اللى قابلتهم واللى مقابلتهمش

كل اللى حسيتهم

كل اللى أتعلمت منهم حاجات حلوة كتير

بجد حبتكم أوى

وبجد علمتوا فى مروة الزارع أوى

وبوعدكم

لو فى يوم أفتكرت مروة الزارع

أكيد هفتكركم

وهفتكر حبكم

55 comments:

توتا المسلمة said...

السلام عليكم ورحمة الله وبركاتة
لية كدا يا مروة ؟؟؟
هو خطيبك طلب دا منك ؟
طب ما تناقشية فى الموضوع يمكن يقتنع ولا حاجة
ولا السبب حاجة تانية غير خطيبك
انا بجد هزعل اوى لو انت مكونتيش موجودة فى المدونة انا ارتبط بيكى بجد يا ميرو يا حبيبتى كان نفسى اشوفك بعينى ولكن انا شفتك بقلبى بس مجتش فرصة اننا نتقابل حاولى يا مروة انك تعديلى عن الفكرة دى استخيرى وفكرى علشان خاطرى
من
توتا المسلمة

توتا المسلمة said...

السلام عليكم ورحمة الله وبركاتة
لية كدا يا مروة ؟؟؟
هو خطيبك طلب دا منك ؟
طب ما تناقشية فى الموضوع يمكن يقتنع ولا حاجة
ولا السبب حاجة تانية غير خطيبك
انا بجد هزعل اوى لو انت مكونتيش موجودة فى المدونة انا ارتبط بيكى بجد يا ميرو يا حبيبتى كان نفسى اشوفك بعينى ولكن انا شفتك بقلبى بس مجتش فرصة اننا نتقابل حاولى يا مروة انك تعديلى عن الفكرة دى استخيرى وفكرى علشان خاطرى
من
توتا المسلمة

صاحب المضيفة said...

لا مش متفقين معاكي في كده خالص


العيلة دي لازم تفضل وتخليها منورة بالطاعة والقرب والايمان


بنستفيد من بعض

وبنقف جنب بعض

وبنخاف على بعض


وده وحده كفاية


حاولي تفكري مرة أخرى فيما اقول


وساعتها هاتعرفي الاجابة لوحدك

اتمنى ذلك يوما

دمت بخير

صوت من مصر said...

بجد انا زعلان جدا لكونى اول تعليق عندك يا مروه فى البوست دى
واحنا هنفتكرك دايما اكيد بس لو هتكونى موجوده هيبقى افضل راجعى قرارك تانى وفكرى

nigro said...

يمكن تكون زياراتي لمدونتك تُعد على أصابع اليد الواحدة
بس بجد أنا حسيت بقبضة قلب بعد قرايتي لكلامك
عارفة لو كنت قلتي انك زهقتي أو ملّيتي التدوين كان الموضوع بقى أرحم شوية وكنت هقول دي مزاجات ودي حريتك الشخصية
بس الأسباب اللي انت ذكرتيها دي صعية قوي
يمكن أنا ماعرفكيش و ما عرفتش أفكارك إيه
بس صدقيني انا اتهزيت من جوايا بكلامك ده
أسأل الله العلى العظيم أن يزيل همك و غمك
و ترجعي مروة اللي انت عارفها و اللي زوّارك عرفوها و أكيد حبوها
ربنا يوفقك

mohammed alsha3r said...

ليه بس كدا
ومن غير أسباب
صعب

بحبك يامصر said...

اول تعليق فى بوست الوداع؟
ليه كده يامروه والله هتوحشينا
يعنى لو كانت وقتك مشغول ممكن بدل ما بتكتبى بوست اسبوعى ممكن يكون كل اسبوعين بوست يعنى حاولى تكونى موجوده باى شكل مينفعش الجروب من غير مروة الزارع
ويارب تعدلى عن فكرتك وتفضلى معانا
تحياتى

nonoymm said...

السلام عليكم
ايه يا موة ليه كدة
طيب من غير حتى ما تكلميني ولو مرة ولا نتقابل حتى مرة
طيب ماشي
عموما في حفظ الله بس عاوزة اطمئن عليكي حتى
تحياتي

semsem said...

انا عرفت اللى حصل من نيجرو
-بس مش بالضبط-
بس بجد ربنا هياخد لك حقك
ربك يمهل ولا يهمل
تمام؟
وبعدين خليكى قويه واقفى على رجلك
اعداء؟وايه المشكله
معنى كده انك ناجحه
طلعى الحب والخير والجمال اللى جواكى ..متحزنيش
متبعديش عن عالم التدوين
هيبقى وحش اوى اوى اوى من غيرك
يارب تقفى على رجليكى تانى
ومتخليش حاجه تكسرك
واعرفى وحطيهاف بالك
ان ربنا هيجيب لك حقك
يعنى هيجيب حقك
اختك فالله

فرنسا هانم said...

خدى اجازه يا مروه
لكن تقفلى المدونه على طول لا
عموما فكرى
ولو قدرتى تبعدى وحسيتى انكى مرتاحه ابعدى واحنا هنبقى مبسوطين وفرحانين انك مبسوطه ومرتاحه
ولو حسيتى بالحنين لينا
هيفضل صدرنا مفتوح ليكى

مجداوية said...

اذا كان جواكى لسه كلام كتير ليه تكتميه وليه تخلى أى حد يسكتك !!! طالما بتقولى الكلام للخير ليه تمنعيه يوصل وليه تسمحى لحد يمنعه ,,على العموم أنا معرفش أسبابك واللى أكيد أقوى منك لكن لو كان انسحابك ضعف أو هروب أو يأس فلازم تراجعى موقفك ويا ريت كنت قلت ليه انسحبت ؟؟بجد أنا حزينة جدا
ربنا معاك

ayman badr said...

ايه يا جدعان
كل ما أدخل مدونة ألاقيها بتقفل يعنى بعد اما نفسى اتفتحت للكتابة تسدوها فى وشى كده
مينفعش يا مروة اول زيارة بس حسيت من حب الناس ليكى ولمدونتك إنك بتقولى حاجة ومش عاوزك تبطلى تقوليها
وأنا موافق فرنسا هانم على إجازة بس متكونش اكتر من 10 ساعات بعد كتابة التعليق ده
تحياتى ومستنى أشوف تدوينتك الجديدة وتعليقك على مدونتى

لما أشوف

Bongo said...

لا إله إلا الله

ليه بس كده يا مروة

انا متابعة مدونتك من فترة و الله و حسيتاه مدونة جميلة و لذيذة

راجعي قرارك

m5m said...
This comment has been removed by the author.
غائب من لائحة الحضور said...

مروة

دخلت مدونتك تقريبا اربع مرات ودخلت النهاردة علشان اشوف شو جديدك تفاجئت لبوست .

اقبلى تحياتى ولم اضيف اكتر من الذين سبقونى فى التعليق

الطائر الحزين said...

كما علقت هناك

اكيد هناك أمر أكبر منك

وانك اصطدمت بأولويات لم يكن التدوين الفائز بها


ولعى اراك انك بين خيارين احدهما التدوين


على الاقل لا تمنعى نفسك فى التعليق عند الناس

تحياتى

رئيس جمهوريه نفسى said...

الاتخت الغاليه مروه
يمكن تعليقاتى عندك تتعد على صوابع اليد ومش بعلق كتير بس والله كنت بدخل كتير ااقرى موضوعاتك واحرج تانى من غير ما اكتب تعليق
عارف انى تعليقى من عدمه مش حيضيف او ينقصك شى بس الى عليز ااقوله ليكى ياريت ترتاحى تاخدى فتره اجازه كلنا بنحتاجها وعادى جدا بس متمشيش واتكلمى واكتبى طلعى كل الى جواكى من فتره للتانيه
عارف وواثق انى فى ظروف خلتك تاخدى قرار ذى ده واكيد كمان اسباب قويه بس الى عايز ااقولوا ليكى انتى قولتى انى المدونتين دول اولادك ينقع تسيبى اولادك من غير رعايه قى نص الطريق من غير ما تكملى رحلتك معاهم
واخواتك المدونين حينفع كده تسبيهم فجاءه
خدى وقتك ويارب ترجعى للتدوين فى ااقرب وقت

أنونيمس said...

هو فيه ايه يا مروه؟؟
انا مكنتش متابع كويس الفتره اللي فاتت

خير؟
طمنيني

monaliza said...

ليه ماشية؟ وايه اللى حصل عشان توقفى افكار كان ممكن تقوليها
عموما ياستى خدى فترة راحة وفكرى كويس واحنا مستنيينك

snohe said...

انتى بتفكرى تلغى المدونه؟
انا مش موافق لو سمحتى لى

هانى نظير عزيز said...

فكرى كويس يا مروة .. يا ريت تستمرى دا هيكون افضل .. من خلال التدوين بنقول اللى مش قادرين نقولة بالفم ...تحياااااااتى ربنا يكون معاكى .

مهندس مصري said...

استريحي براحتك
لكن لو قدرتي ياريت ترجعي تدوني تاني
او تعلقي على الأقل

دمعاتي said...

خدي فترة استراحه لغاية ما الازمه تعدي
وبعدين ارجعلنا تاني
ربنا معاكي

WhItE HeArT said...

مش عارف اقول ايه قريت تعليقاتي المدونين اللي قابلي كلهم تقريبا هما قالو كل اللي يتقال لكن بجد هكون حزين جدا لو ابتعدتي لإن المدونه دي بشوف فيها بروح وحياة مش موجوده في كتير من المدونات


اعتقد انك لازم تفكري كويس

تحياتي

WhItE HeArT said...
This comment has been removed by the author.
اهو ده عيبه said...

ليه بس كده
انتى مدونتك هايلة وكمان رسوماتك

فكرى كويس قبل ما تعملى ده
انا معرفش ايه اسبابك بس ساعات بتعدى على الانسان اوقات بيبقى مش لاقى حاجة يقولها او مخنوق من كل حاجة لكن ده مش معناه انه يلغى حاجات فى حياته ليها قيمه عنده وعند ناس تانية كتير

هانى نظير عزيز said...

انت اقوى من ذلك يا مروة ... تحيااااااتى لك .الرب معكى

walaa said...

ممكن تمشى تاخدى فترة ناقاها لكن مش تمشى خالص مستنين ترجعى تانى لينا
تحياتى ولاء

عبدالرحمن فارس said...

لازم ترجعي يامروه لو مكنش عشانك يبقى عشان الناس الي بتابعك وبتتعلم

لما كل واحد بيكتب كويس يمشياو يقفل مدونته هنسيب التدوين لمين للي قلبوها سمك لبن تمر هندي

لازم ترجعي

انا في انتظارك
كوني هنا دائما
لا تبتعدي كثيرا


تحياتي
و
محبتي

الشنكوتي الكبير said...

ايه يا اخويا ده
هو احنا مش هنخلص كل كام يوم حد يقع مننا
ليه يعني
ايه السبب هو كل واحد يزهق ويياس يركن ويقول مش لاعب
خلاص كده اللعبه بقت سخيفه
والناس دي كلها بقت سخيفه وعايزه تلعبي مع حد غيرهم

مش عارف اقولك ايه جايز مكناش معرفه جامده لكن كلامك زعلني على كل مدون فجأه بيقرر انه يمشي ويسيبنا

انتي صاحبة قرارك

اعذريني لكلماتي
سلااااااااااااااااااااااام

MKSARAT SAYED SAAD said...

مروة مش عارف اقولك ومش عارف ممكن كلامي يوصلك ولا لأ
بس اللي هقولهولك هو جمله واحده
مهما كان السبب اللي كان اقوى منك متديش الفرصه لنفسك انك تعمل اسقاط على اشياء جميلة في حياتك
فكرى كويس في اللي بقوله هتفرق معاكي فحاجات كتير
دمتى بكل واتمنى اشوفك في التدرين قريب
تحياتي
سيد سعد

حمادة زيدان said...

مروة هانم
والله حرام عليكي القرار ده , مدونتك بقت سلطة جميلة وأفكارك فيها حلوة جدا وكل الكاركتير بتاعك عبقري , حرام تحرمينا من كل ده
خدى وقتك في الاستراحة وارجعى بليز

بت خيخة وأى كلام said...

مش فاهمة حاجة يا ميرو
هتقفلى المدونة علشان اتخطبتى يعنى ولا ايه؟
لو علشان خاطر الخطوبة من حقنا نعرف ايه الضرر لما تكونى مخطوبة وعندك مدونة
هل فيه حاجة تانية تمنعك من التدوين ومش عايزة تقوليلنا عليها

هابقى اكلمك بكرة علشان افهم منك اكتر

ربنا يوفقك ويسعدك يارب
تحياتى ليكى
اختك خيخة

مصطفى محمد said...

:(
:(
:(

رفقة عمر said...

مش هاقولك غير انك حزنتينى جداا
ووجعتى قلبى اتمنى انك تفكرى تانى
وربنا ييسر لييكى الامور

اعترافات انثى جامحة said...

هتقفليها ليه

midohits said...

أحبك فى الله يا مروة ومتابع مدوناتك وبوستاتك بانتظام بس فى صمت وتمنياتى بالتوفيق يا مروة بس بلاش تفكير بالتراجع ويارب قدما للأمام

د/اجدع بنوته said...

ايه يابنتى ف ايه

لا حول ولاقوة الا بالله

انتى م اخر الناس اللى كنت اتخيل انها فتكر يوم تتوقف عن التدوين

ع العموم ربنا يهديكى يارب للى فيه الخير ليكى

ومبروك ع الخطوبه

واحنا دايما فاكرينك

وهنفرح اكتر لو رجعتى ببوستاتك لينا

الشموع البيضاء said...

ايه ده بقاااااااا
ايه الى حصل كل شويه حد عاوز يمشى؟؟
نووووووو انسى تماما انا حاولت اعمل كده بتكون لحظات ضعف وغضب وبنرجع تاااانى
منتظرينك

Whispers just for a Night said...

السيدة الكريمة

تابعي على مدونة قولاً سديداً رد الحكومة الهولندية على حملة المدونة لدعوة الحكومة الهولندية لسن قوانين ردعية تمنع حدوث الإستهزاء بالمقدسات الدينية ورد المدونة عليهم على الربط التالي
http://kawlansadida.blogspot.com/2008/04/blog-post_18.html

وجزاكم الله عن نبيكم خيراً

Anonymous said...

السلام عليكم و رحمة الله , الأخت مروة
لقد أحسنت صنعا إذ نويت ترك هذا الهراء و العبث الذي لا طائل من ورائه.. لقد كنت ادعو في صلاتي ان يمنحك الله القدير القدرة على أن تكفي عن هذا العمل أنت و من ورائك من الشباب التائه المحبط في بلدنا المصابة مصر, لا لخطوبة و لا زواج و لكن لما هو أجدى و أنفع إن شاء الله.. إنكم لا شك تحسبون أنكم تحسنون صنعا بما تفعلون و لكن هيهات هيهات.. و لكن الحق أقول إنني كنت سعيدا بعض الشئ بما تكتبين أنت و من لف لفك من شباب المدونين كراهة و مقتا في "حسني مبارك" (لا أحسن الله إليه و لا بارك له أينما ولى) وابنيه و زوجته العجوز الشمطاء و آله و أتباعه أنصاره و ولاته عليهم لعائن الله و الملائكة و الناس أجمعين تترا متواليات إلى يوم الدين .. آمين .. و حيث أن هؤلاء المجرمين التعساء الأوغاد لم و لن يتركوا أماكنهم ضجرا بمدوناتكم أو مظاهراتكم او حتى إضرابانكم , لذا فإنني أرى أن من الحكمة أن تكفوا عن تلك المدونات و أن تتوحدوا و تنظموا صفوفكم من أجل عمل أقوى و أجدى و أقرب نفعا مع الاستدامة على الدعاء الضارع الملح حتى تنزاح غمة "مبارك" و فصيله و قبيله لا عن مصر وحدها و لكن عن أمة الإسلام أجمع في مشارق الأرض و مغاريها .. آمييييييييييييييييييييييييييييييييين.. و السلام ختام..
مسلم ضارع

مدحت محمد said...

ليه كدة بس يامروة

وجـــه جـــديد said...

طبعا انا حزين جدا و انا بأعلق
و لكن اقل ما فيها
ما لا يدرك كله
لا يترك كله
حاولي تدوني
حسب ظروفك
نظمي وقتك
ناقشي من شاركك القرار
لكن ابتعاد بلا عودة
اصعب قرار

la3lahakhier said...

بقى دا كلام طاب واحنا طيب؟
طاب ادى هنت عن السبب
بما انى زعيمة التمرد النسائى الخيبان بقولك لا معلش بقى استريحى وكملى

Massagem said...

Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Massagem, I hope you enjoy. The address is http://massagem-brasil.blogspot.com. A hug.

Ahmed Mubarak said...

بلاش يا مروة بجد بلاش

فكري تاني .. واحد زيي كان بيزورك ومبيكتبش حاجة .. بس بيجي .. فكري تاني عايزينك معانا

حرة المداد. said...
This comment has been removed by the author.
أحمد سعيد بسيوني said...

عموما
ربنا يوفقك في حياتك سواء استمريتي ام لا
تحياتي الخالصة

إنـســـانـة said...

لا حول ولا قوة الا بالله

انا سمعت انك اتخطبتى فجيت اباركلك لاقيتك بتقفلى المدونة .. حاسة انى عايزة اعتذرلك جامد اوى واقولك انا اسفة

اسفة لانى بعدت اوى الفترة اللى فاتت .. واسفة انى ادخل مدونتك والاقيكى عايزة تبطلى تكتبى تانى

اسفة والله .. اسفة بجد

:'(

shirry said...

ليه كدة يا مروة بد احنا حبيناكي اوي
بلاش تمشي بجد ومفيش ظروف تخليكي تعملي كدة ولو كان خطيسبك حاولي تقعدي تتكلمي معاه
بجد يا مروة بلاش
انا مستينة انك ترجعي عن قرارك

Ahmed Mubarak said...

وصلني انك اتخطبتي يا مروة

الف مبروك

وربنا يوفقك

Dr.Mohammed Gohary said...

الف مبروك عالخطوبه للأسف الوقت ما عدش يسمح بالتواصل
أتمنالك حياه زي اللووووووز

تحياتي
د. محمد الجوهري

خمسة فضفضة said...

السلام عليكم ورحمة الله وبركاته

ايه يا مرمر جايهابارك واهني علي الخطوبه الاقي الصدمة دي ليه كده يا بنتي
استهدي بالله كده وفكري تاني في القرار ده
واكيد هاترجعي في كلامك علي طول

شايفه اهه ان كل الناس مش موافقاكي علي القرار ده

فكري يا مرمر واستعيذي بالله من الشيطان

سلام يا قمر والف مبروك علي الخطوبه

mado80 said...

مروه

ليه كده هو حد زعلك ولا إيه

:(
:(
:(
:(
:(

أحمد مصطفى said...

سبحانك يارب

كنت باقراء فى بورفيلت المدونين

لقيت بورفيلك شدنى

قلت أدخل مدونتك

وأتعرف عليكى

لقيت أنك بتودعى الناس

بصراحة مش عارف أقولك ايه

غير أنك لازم ترجعى نفسك

لان قرار الغاء مدونتك دا صعب قوى قوى

ربنا يوفقك الى الصلاح

تقبلى تحياتى واحترامى

أحمد مصطفى