أنت بالحب أجمل

طبعا يا جماعة كلكم عارفين إن عيد الحب قرب كل سنة وأنتم كلكم طيبين


وبتحبوا بعض يارب


بالمناسبة دى أنا عملت البوست دة


كل سنة قرب عيد الحب كدة بلاقى إيميلاتى مليانة بلاوى


سورى يا جماعة فى كلمة بلاوى


أنا فعلا شايفاها بلاوى عشان مش لاقية معنى للى بيحصل دة


تلاقوا أية بقى رسايل وصور وكلام وحوارات


ويقولك أية بقى





أخى المسلم أحترس من عيد الحب فهو حرام


وسوف تروح النار حدف يامنيل على عينك


جتك وكسة





والناس يا عينى غلبانة ومعذورة ومش فاهمة


وبتصدق عشان كلنا نفسنا نخش الجنة


نفسى أفهم حاجة واحدة


مين إبن (الناس الطيبة) إللى قاعد يحرم ويحلل على مزاجة دة


وعمال يرسم فى صور ويعمل المجهود الجبار دة


ويحرم فى كل المنتديات والمجموعات البريدية


سبحانك يارب أنا مش قادرة أوصل بعقلى للكلام دة بيتكلموة إزاى


ربنا سبحانة وتعالى عمرة ما حرم الحب أبدا


وكان كمان الرسول علية الصلاة والسلام بيدعوا للحب والتقارب


وزى ما قال تهادوا تحابوا


وربنا سبحانة وتعالى أمرنا بوصل الأرحام


عشان هدف الحب بينا وبينهم برضة


ووصانا الرسول علية الصلاة والسلام على سابع جار برضة زى ما بيقولوا


كلة دة بهدف نشر الحب برضة


مش قادر أفهم يعنى أية يعتبروا عيد الحب رجس من عمل الشيطان


بما إنة صناعة غربية يعنى


خلاص لو إحنا مشينا على المنطق دة


يبقى بقى التفاح الأمريكانى والجاتوة والمكرونة البشاميل وما شبة حرام شرعا


بما إنهم زراعات صناعات غربية يعنى


حاجة غريبة فعلا وفاقعة مرارتى ولو كان حد هيختلف معايا


هما لية مش قادرين يفهموا إن فية حب كتير حلال


ومش شرط كمان الحب يكون حب عاطفى بس


فية مليون نوع حب على فكرة غير حب الراجل للست والست للراجل


فية حب الأم وحب الأبناء وحب الصديق وحب الأخوات وحب الحب نفسة


يااااااااااااااااااااااة يا جماعة الحب دة أعظم شئ فى الوجود


أنا من رأيى دايما .. أنت بالحب أجمل


الحب دة الشئ السحرى إللى بيخليك عايش وراضى


وواثق من نفسك وحابب الحياة


حاجة بتخليك كدة مرتاح وهادى وجميل ولذيذ


حاجة مش بنشوفها ولا بتتباع ولا بنمسكها بس الذ واحلى حاجة فى الوجود


أنا بتكلم على كل أنواع الحب وركزوا معايا كويس


بس المشكلة دلوقتى إن مشاغل الحياة وارتم السريع وقلة بركة الوقت


بقت تنسينا حبايبنا وتشغلنا عنهم


عشان كدة أنا بجد شايفة إن أختراع عيد الحب وعيد الأم دة من أعظم الإختراعات


بيخلونا نفتكر حبايبنا ونتصل بيهم ونزورهم ونقابلهم ونجيب لهم هدايا ولو بسيطة ونقولهم


إحنـــــــا بنحبـــــكم أوى


عاوزة كل واحد يتخيل كدة لو راح الشغل ولا الكلية ولا المدرسة بتاعتة


ولقى زميلة ولا اى حد جايب لة وردة فى عيد الحب وبيقولة انا بحبك فى الله


هيحس بأية؟؟؟؟؟


حاجة لا توصف .. مش كدة؟؟؟؟





ودى دعوة بقدمها للكل من خلال مدونتى المتواضعة


عاوزين يا جماعة كل واحد فى اليوم دة يفتكر كل حبايبة ويتصل بيهم


ولو تقدروا تزوروهم زوروهم أو قابلوهم


وقولهم وحشتونا يا جماعة .. بنحبكم بجد


وياسلام لو نهادى بعض ولـــــــــــو بـ وردة


ولا لبانة تشكلس حتى


شعور جميل أوى بجد لما نحس اننا بنتحب وبنحب





يالا عاوزة كل واحد يفرقع كارت بخمسة وعشرين جنية


ويتصل بكل اصحابة ويعيد عليهم ويقولهم وحشتونا وبنحبكم


ولو مفلس يعنى


يحول 10 ج ولا 5 ج ولا 3 ج حتى


من عند السنترال اللى على ناصية الشارع بتاعة


ويبعت رسايل لأصحابة وحبايبة ويقولهم نفس الكلام


ولو مفلس أوووووى يعنى


حول يا عم 1 جنية بس ورن عليهم وحسسهم أنك فاكرهم


وإللى تعرف رقم بيتة كلمة فية





ياسلام لما تفتكر اصحابك الجداد والقدام


وجرانك


ومامتك وباباك وأخواتك


وقرايبك البعاد


وحماتك وحماكى


وبواب العمارة


وعم متولى البقال


وعم خيشة الزبال


وعم حنفى المسحراتى


والخالة فواكة بتاعة الجرجير


والخالة فتحية بتاعة العيش


وعم محمد بتاع اللبن


وحتى أعداءك


ويا سلام لو كل واحد يفتكر مراتة ولا خطيبتة ولا حبيبتة بهدية


ولو كل واحدة تفتكر جوزها ولا خطيبها ولا حبيبها بهدية


الله ةةةةةةةةةةة ساعتاها كل الناس هتحب بعض





يالا يا جماعة كلنا نحب بعض





بحبكم كلكم على فكرة