.
.
.
.وأنا راحة الشغل النهاردة الصبح ومتأخرة ومتنرفزة على الأخر
وبقول يا فتاح يا عليم
وبعد معاناة فى إيجاد الميكروباص المنشود
والمعاناة اليومية للصعود إلية
وعلى رأى نجاة
(ما أصعب الصعود إلية)
على وزن ما أحلى الرجوع إلية يعنى
:)))))
أفاجئ إن الأخ بتاع الميكروباص بيصبحنا بالأغنية الشاعرية دى
.
.
.
بحبك يا حمار، ولعلمك يا حمار، أنا بزعل أوي لما، حد يقول لك يا
يا عم، الحمير كلهم .. عليا الطرب
لابس حزام بدل اللجام .. وبترقص بلدي ورومبا
وعليك رفسة إنما .. وبتفطر شاي وباتية
وأيس كريم بدل ... وبدال التبن مربّى
وبحبك ياحمار ولعلمك ياحمار أنا بزعل أوى لما حد يقولك ياحمار
دا وإنت جحش وفى اللفة .. أبوك عمل حتة زفة
لا تقول بقرة ولا جاموسة والنعمة تستاهل بوسة
.
.
.
.
ومكنتش طبعا دى سابقتى الأولى مع الأغانى الحمورية والخضارية والفكهاوية والمخدراتية
وعلى رأى المثل .. إللى يركب من المطرية ياما يشوف
وياما سمعت رغم أنفى
بس مكنتش طالبة عالصبح يعنى خااااااااالص
ولما رحت الشغل
وأنا داخلة العمارة لا بيا ولا عليا
لاقيت البواب عامل رنة بحبك يا حمار
(للى ميعرفش .. البواب لا يحمل محمول أقل من كامرتين)
:(((((
وسيبكم من حلمى القديم أشتغل بواب وخلينا فى المهم
قولت لنفسى دة إستقصاد عالصبح بقى
ودخلت الشركة بعد إستطباحة حمورية محصلتش
قعدت طول اليوم احاول اطرد بحبك يا حمار من نافوخى
مفيش فايدة
أديتها كوكتيل لحبيبة قلبى ( نجاة ) وبرضة الحمار بيزن سورى بينهق فى نافوخى
وقعدت مستغربة لية بيغنوا كدة
ومن ابن ... (ولا بلاش) اللى بيسمع الاغانى دى
ودخلت وانا قاعدة كدة بشرب (مسكوفية) الضهر وعملت سيرش
لاقيت أية بقى
إن الأغنية دى من أكتر الأغانى طلب للتحميل على القنوات الفضائية ومواقع الأغانى
!!!!!!!!!!
وحوالي 13 مليون محمول حاطتها نغمة رنين
!!!!!!!!!
ولاقيت كمان لقاء مع ( الفاننان ) سعد الصغير مبدع الأغنية
بيقول إن مفيهاش حاجة لما يغنى للحمار
بإعتبارة رمز للطيبة والنقاء والوفاء
وإن الغناء للحمار مش من أبتكارة
وسبقة الفنان الكبير شعبولا ويعتبر قائد الأغانى الحمورية العظيم هااااااى هيئ
حقيقى والله عصر مطرب لكل مواطن
ياااااا ( الفان ) إللى فيكى يا مصر
عمااااااااااار يا بلد
21 comments:
انا كدة عرفت ايه اكتر حاجة بنزعلك
بعد الكوسه طبعا !!!
الاغاني دي ابتلاء فعلا ومش اغنية الحمار بس لا دي القايمة طويلة لكن الغريب ان الناس بتسمعها وعاجباها
لغاية ما ودانا اتلوثت ومش عارفين ننضفها ازاي .. ربنا يهدي
ربنا يشفي كل مريض ويهدينا كلنا للخير
الواحد مش بقى عارف ايه الحلو من الوحش
دي حاجه تمرض بجد
تحياتي أختي الكريمة
هيه الحمير بتتعب اه
بس يعني ايه زنبنا نستحمل حموريه المسؤلين وحمورية اللي بيغنوا للحمير
مش كفاية حمورية الحمير
الصورة معبرة جدا
الفراغ الفكري يعمل المستحيل
يجمعنا على الحمار
ونحدف نفسنا تحت العربيات عشان كاس الأمم الإفريقية
يامروووووووه ياحبيبتى يعنى اشمعنى الحمار بجد اللى مش هيغنوا له
هو مغضوووب عليه يعنى
ده حتى حمال اسيه
بلاش نبقى قاسيين على الحمار اوى كده :)
واهو كله برتقال يااختى :)
وحشتينى على فكره يارورو
هههههههههههههههههههههههههه
عناااااااااابي
يا عنااااااابي
عناااااااااابي
يا عنابي
و يستمر المطرب الهمام لمدة مثلا عشر دقايق في نفس الكلمة دي
تعمللي ايه بقي؟؟
يا بنتي الفن تردي عندنا بدرجة فظيعة
ع العموم فيه برضه ناس كويسة
تحياتي ليكي
:))
يا مروه يا بنتى الغناء للحمير مش عيب
و متنسيش الفنان يونس شلبى لما غنى للجموسه .. و يا عينى على الجواميس لما تتقابل يا عينى
بأعتبار الجموسه رمز الحنان و اللبن و اللحمه
عادى يا مروه انا اصلاً كل يوم بسمع اغنيه جديده زى الزفت و بشوف كل يوم مطربين جداد و كأنها بقت مهنه اى حد يقدر يأديها و بقت هيا الحل للبطاله لو عايزه رأيى
تحياااااتى و موضوع حلو كالعاده يا مروه
عداءك للحمير غير مبرر
الله
مالو الحمار
ده رمز
أمريكا ليها الثور
أفريقيا ليها أسود و أفيال
مصر ليها الحمار
و حسبي الله و نعم الوكيل
:)
سلاماتي
انتى معترضه على الاغنيه للحمير ولا على مستوى الاغانى لو على مستوى الاغانى فده عادى جدا
مثال خدى الاغنيه دى وقوليى عرفتى ايه منها
( اكتبلى تنازل عن قلبك واكتبلك شيك
على بنك القلب الى يحبك يا حليوه يا شيك)
الاغنيه التانيه
( تشترينى بكام يا عم
اشترينى وده الاهم )
ده مثال لاغانى مطالب انى اسمعها مع كل ميكروباص بركبه او كل فرح بدعى عليه ممكن تقوليلى فى عجاله غير مخل ما هو المطلوب من هذه الاغانى
فعلاً اصبحت بلد حمير حمير
بصي انا متهيألي كده ان الحمار اللي بيغنيله صحبنا
تورية عن شخصية بعينها اكيد فهماني
لان كلنا بنحب الحمار ده
لانه اكبر حمار في الدولة ولا ايه
ان عندي سؤال ومحتاج لاجابة
لو تشرفيني في المدونة تعرفي السؤال وتجاوبي عليه
هههههههههههههههه
بجد معنديش رد
طيب انا مرة سمعت اغنيه حزاينى اوى والراجل عمال يعانى ويغنى ويقول ايه بقىىىىىىىىى
صاحبى طمعان فى مراتى
اه والله
شوفتى بقى وصلنا لفين فهى لو الحمار مقدور عليها
وسلامى
:)))
عسلللللللل
و الله الحمار طيب و ابن حلال و يستاهل كل خير
تحياتي يامروة
هكذا هي الحياة...ناس جادة تحفر الصخر وناس لاهية...لا تدري ان كانوا احياءً ام اموات يحيون...
المهم انه يفترض ان وسائل المواصلات العامة...مثل الميكروباص او الباص...و التاكسي لا يذاع فيها شيء
اللهم الا اذا كان نوع من انواع الموسيقي...
لكن كما عنونتي انت البلوج " بقت سلطة"....و كل واحد عايش مع نفسه حتي لو كان عايش في الغيبوبة ( مع الاعتذار للفنان محمد صبحي ) .
تحياتي و تقديري ودمتي بألف خير.
احنا بتوع المطريه فعلا لازم نسمع على الصبح سعد او اى مطرب من بتوع الحخيوانات صح ولا ايه ؟
هو الواحد لما يحب ينهق تتكتب ازاى
هيق هيق هيق
شى شى شى
هييييييييييييييييس
حا
عارفة جه فى بالى ايه كريمة
فاستخف فرعون قومة فاطاعوه
تحياتى
وحمدا لله على السلامة
اهو اي كلام فارغ وخلاص
ماتزعليش نفسك بس يا خربيته الحمار اللي هيزعلك
بلاش منه الحمار يل ستي
وحشاني با مرمر
انا معاكى يا مروة لكن لو بطلنا نسمع الحمير اذا هيحصل كالاتى
لن يبث على اى قناة اراء مجلس الشعب ومش هنسمع كمان خطب الريس وطبعا مش هنسمع اى رأى من اراء الوزراء والمحافظين واى حد وكذلك مساطب شيوخ الازهر و.... عدد لا نهائى من الحمير
يا مروة انتى بجد انسانة سفيهة سايبة قضايا الدنيا كلها زى العراق ومدابحها والجوع اللى ياما عانت منة الصومال ورايحة تشتكى من اغنية انا اتاكدت من البوست دة انك لاتفقهى اى شىء فى السياسة
يا بنتي انا لما بسمع اغاني سعد الضغير ده بحس ان وداني بتطول من نفسها كدة تلقائي يعني... مش بعيد بقى ومع تقدم الاغنية الحيوانية الخضراتية الاقي طلعلي ديل واقعد انهق لاء وايه بقى النهاردة الصبح انا كمان والله كانو مشغلين اغنية ( قلوو ) دي الراجل صعب عليا قاعد يقول قوللو من الصبح لما صدعني
احب اوضح نقطة ان المدونات دي صفحات على الانترنت بيكتب فها صاحبها الي هوا عايزه في الموضوع اللي عايزه سواء كان فن او علم او ثقافة او سياسة او حتى تفاهة هوا حر دي مدونته الشخصية واراءه الشخصية وكل حاجة على مسؤليته وبمزاجه
Post a Comment