2008/03/26

عندما تسقط الأقنعة

تحــــــــــــــديـــــــــــــــــــــــــــث

أنا لاحظت يا جماعة إن معظم الناس مش فاهمينى فى البوست دة

طبعا أنا بشكر كل إللى شرفونى وقروا البوست

وبقولكم كلكم سامحونى عشان أنا مش بقدر أرد على التعليقات اليومين دول لظروف معينة

وأسمحولى أشرح لكم البوست دة بالبلدى كدة

........................

هو واحد بيمثل أى حد فينا

راح قعد على شط المية وقت الغروب

قعد يفتكر حد كان بيحبة

بيفتكر حب لية

حب أخلص فية بجد وكان جزاؤة الغدر والخيانة

أى حد كان بيحبة مش شرط حبيبة بس

وصف الحب دة بمرض خبيث

عشان أكتشف فى النهاية إن الشخص إللى كان بيحبة كان لابس قناع

وياما ناس فى حياتنا بقوا مقنعين ومبقناش نعرف وشهم الحقيقى

كان الشخص التانى بيمثل علية وفى الأخر بان على حقيقتة

فى النهاية قرر الشخص المصدوم فى حبه

نسيان ذكرياتة ونسيان الشخص المقنع دة

وبدأ حياة جديدة

وقرر يدور لنفسة على حب جديد وحياة جديدة

...........................

وبالنسبة لشرح الكريكاتير

هو واحد من اللى بيلبسوا الأقنعة

بيفتح دولابة

وبيختار قناع من أقنعته

وملامحة أصلا مبهمة

...........................

بس كدة

ياريت تقروا القصة تانى وتحاولوا تفهمونى

أنا بتأسف ليكم جدا

عشان مقدرتش أكون مفهومة بسهولة

تحياتى وحبى ليكم كلكم

مروة الزارع

..................................



جلس هناك على صفحة الماء وقت الغروب


والشمس تدنو للمغيب


كان يجمع أوراقة


جلس هناك فى المقعد الشاغر


شرد ذهنة


سأل نفسة


منذ متى تملك منة ذلك المرض؟


مرض!!!!!!!


هنا تجمدت حواسة عندما نطق هذة الكلمة


لأول مرة ينادية بمصطلحة الحقيقى


لأول مرة ينادية هكذا


لأول مرة يدرك معنى هذة الكلمة


لأول مرة يدركة


توقف برهة وحاول أن يتذكر


لم يعد يذكر منذ متى سرى فى خلاياة


لم يعد يذكر منذ متى تملك منة


شعر كأنة ولد به


ولا يعلم غير حقيقة واحدة


أنه يذكرة فقط


أمسك بدفاترة القديمة الصفراء من الزمن


دفاترة الملطخة بدمة


قلب صفحاتها وتجمد عند أول صفحة


ها هو هناك ذلك المرض الخبيث


رأه هناك يربط على كتفة


رأه هناك يتوغل بين ثنايا ملامحه


هاهى نظرته الطيبه له


هاهى نظرة العطف والحنان الخادعة


رأى وعودة له بالأمان


قلب صفحتة وهو ينظر لإنعكاس وجه على صفحة الماء


شعر بغربة حينما رأى ملامح وجهه


رأع ملامح وجهه وكأنها لم تعد ملامحة التى يعرفها


ملامح باهته


ملامح محطمه بائسه


رأه هناك مختفى بين طيات ملامحه


رأه هناك فى أطلال بريق عينية المنعكس


قلب صفحه دفاترة


رأه من جديد بين طيات الورق


ها هو يبتسم له تلك الإبتسامة الزائفه


هاهو ذلك المرض يشدة له


هاهو يجعلة يعشقة


يعشقة!!!!


لم يستطيع أن يتهرب من تلك الحقيقة المرة


نعم عشقه


عشقه بكل وجدانه


رأى نفسه وهو بنفسه يفتح له الأبواب كى يتوغل فى جسده


رأى نفسه وهو يصدقه ويستسلم ويرفع كل رايات الإستسلام


قلب صفحه دفاترة


رأى فيها الملامح التى تغيرت


رأه وهو يغير ملامحه وتسقط كل أقنعته


لتعلن عن وجهه الحقيقى


وجهه الذى يحمل كل شراسة وخداع الدنيا


رأى حينما أختفت وتلاشت تلك الطيبه


هنا


ترك أوراقه تطير فى الهواء


طارت عليا لتستقر على صفحة الماء


ووقف ينظر برهه لملامحة الباهته المنعكسه


الملامح التى سقطت أمامها كل الأقنعه


ملامح تحمل كل عذاب وألم الدنيا


وهنا قام وغادر


تاركاَ ورائه أوراقة تطفو


تاركاَ وراءه ملامح وجهه


وقرر أن يبحث لنفسه عن ملامح جديدة


وأبتسم


وتذكر أنه لم يكن سوى مرض


لم يكن سوى مرض

2008/03/23

وقولوا ورايا ... يـعـمـر بـيـت أبوووووه



الكوسة كانت نوع من الخضار

ولكن دلوقتى بقت هى المسار

كوسة فى بيتنا وشغلنا و حياتنا

حتى الكوسة بقت فى موتنا

المرحوم بية كان مسئول

كدة مش عارف أبصر أية

طبعاَ عزا يتحكى علية

ولازم البلد كلها تحضر فية

والتانى قال بيقولوا علية فنان

رقاص ولا ممثل ولا بتاع ألحان

صوان دة ولا قاعة سيما

الناس فيها رسم وقيمة

ومات الغلبـــــــــــــــــــــــــــــان

والكل عامل فيها نايم وغفلان

بس عند ربك كلنا بنى أدميين

لكن مين بقى فاضى يقرا فى الدين

بيقولوا دى وجاهة إجتماعية

بنرفع من روحهم المعنوية

طب ترفع ياعم إزاى وهما ميتيين

يقولوا أنت مالك ماتحط وشك فى الطين

أنت عاوز تبقى راسك براس المسؤليين

وأخرس بقى لتبقى مع التانيين

إللى بقوا فى حوسة ورا الشمس مرميين

إللى حولوا بس يمنعوا الكوسة من بلدك يا حزين


بالإشتراك فى الكلمات مع محمود الزارع

2008/03/20

وكلنا الحلاوة !!!!! هه ما طول عمرنااااا واكلينهاااااااا



قوم أجرى أنت قاعد لية

روح هاتلك حلاوة ولو الحتة بمية جنية

دة جارك جاب الحلاوة هو وعيالة وأتهنوا

على فكرة كدة بقى ربنا راضى عنة

أمال أية دة كل حتة بحسنة

أتشطر أنت وكل هتلاقى الأنبيا جيالك فى الحلم مبتسمة

هات للبت عروسة وهات للواد حصان

ومتبخلش عليهم بالحسنات خليك جنتل مان

وأوعى تنسى الملبن والفندام والسمسمية

علشان تعلى حساناتك بلا خيبة قوية

وكل ما تكبر حجم علبتك

كل ما تزيد حجم جنتك

وطبعا ربك رب قلوب وهات معاك بزيادة

دا أنت بتنفذ المكتوب وربنا مايقطعلك عادة

ويالا بقى كل موسم وأنت طيب

ومتنساش تظبط علبتك ومتخليش حد عليها يعيب


بالإشتراك فى الكلمات مع محمود الزارع

2008/03/19

ياقلب يا كتاكت ياما انت شايف وساكت


جدو جدو جدو جدو جدوووووووووووووووو
جدووو حبيبنا يا جدووو وحشتنا موووووووووت

مووووووووووووووت موووووووووووت

ألتف الأطفال حول جدهم الحبيب فى سعادة غامرة

بعد أشتياق أسبوع كامل وجلسوا بفرحة يتسامرون

- جدو كان نفسنا نشوفك جامد من بدرى بس ماما كانت عاوزانا نذاكر

- معلش يا حبايبى ماهو لازم تذاكروا المذاكرة أهم

هييييييييييييية فكرتونى بنفسى لما كنت بذاكر

وبابا كان بيزعقلى عشان أذاكر

ولما أتخرجت سنة 2008 يعنى من أربعيييييييييييييييييييييييييييييين سنة

أنطلق الأطفال يضحكون

- أنت باباك كان بيزعقلك زينا عشان تذاكر ههههههههههههههههه

- طبعا يا حبايبى كان مسكين فاكر أنى هشتغل بالشهادة

وفى أثناء ضحك الأطفال ظهر أعلان فى القفازيون

الجيل الجديد من التلفزيون

يعلن عن منتج جديد من حلوى الأطفال فى الأسواق ويعلن عن رخص تمنة

هنا ضحك الجد وقال

- هههههههههههههههه زمنكم بقى أخبر يا حبايبى

عارفين على أيامى كنت بشترى إزازة البيبس الصاروخ ب 1 جنية بس

ضحك الأطفال كثيرااااااا وقالوا

- ههههههههههههههههههههه مش ممكن يا جدو معقول

- أة والله وكنا بنشترى شكولاتة كادبورى ب 2 جنية بس

والبيضة كانت ب 50 قرش

وإزازة الزيت درجة 10 كانت ب 11 جنية

أةةةةةةةةةةةةةة كاااااااااااااااااانت أيااااااااااااااااام

وقع الأطقال أرضا من كثرة الضحك

- يااااااااااااااااة معقول يا جدو أنتوا كنتوا رخااااااااااص أوى

- ورغيف العيش المدعم كان ب 5 قروش والتانى كان بربع جنية بس

وكمان أية أى حد كان ممكن يروح يشترى عيش بسهولة كدة

مش محتاج غير يوم أجازة من الشغل ومطوتة وخلاص ويروح يقف فى الطابور

الأطفال بضحك و إذبهلال

- ياااااااااااااااااااااة دا أنتوا كنتوا رخاص أوى وحياتكم كانت سهلة خالص

- الله يكون فى عونكم يا حبايبى على زمنكم دة

أحنا كنا أحسن منكم كتير كنا بناكل وبنشرب

صحيح كنا بناكل أكل مايعلم بية إلا الله بس كنا بناكل

وكنا بنشرب كمان وصحيح كنا بنشرب مية ما يعلم بيها إلا الله

بس كنا بنشرب

وكنا بنلاقى مواصالات نركبها صحيح كنا بنضغط وبنتفعص

بس كنا بنركب

كان أكلنا لسة فية أمل يبقى صالح

كان ميتنا لسة فيها أمل تبقى صالحة

كانت قلوبنا لسة فيها أمل تبقى صالحة

الله يكون فى عونكم يا حبايبى من قلبى

- كفاية رغى بقى ياجدو وهات المصروف بقىىىىىى

- خدوا يا حبايبى كل واحد ياخد ال 10000 جنية بتوعة

ويروح يشترى إزازة سم كولا بسرعة ومتتأخروش وأمشوا جمب الحيط

- حاضرياجدو يا حبيبى

مووووووووووووووة

وعندما خرج الأطفال أدار الجد جهاز القفازيون

ليستمع للأغنية الرسمية للبلاد

(مملكة الكوسة الشعبية)

أخترناااااااك وبيعناااااااااك وعشان كدة أحنا إخترنااااااااااك

تات تررراررررات ترراااا لم لم لىىىىىى

2008/03/15

المجانين فى نعيم !!!!!



ذهبت هناك

رأيتهم

سمعتهم

شعرت بهم

أشباة البشر

وجوة تكسوها الحزن والألم

تنبعث من بين ثنايا جلدها الصرخات

يعيشون الموت الحى فى صمت

يتألمون فى صمت

يصرخون فى صمت

وتجاوبهم جدران الصمت

ويغيب الصوت

لا أحد يسمعهم

لا أحد يشعر بهم

لا أحد يراهم

هم أشباة البشر

بل هم بقايا بشر

.............................

المكان : مستشفى الأمراض العقلية بالعباسية

الزمن : يوم الثلاثاء 11/3/2008

الوقت : من الساعة 10 ص الى الساعة 3م

......................................

ذهبت مع أختى التى تتلقى التدريب العملى هناك

كنت أريد أن أخوض تلك التجربة الحية عن قرب

كان فضولى يلح على أن أراهم فقط

لم أكن حقيقاَ أتوقع ما سوف أراة

لم أكن أتخيل ما سيصيبنى من خوف وإحباط وألم

..........................

عندما وصلنا المستشفى أنتحلت شخصية إحدى الطلبة

كى أستطيع الدخول مع الطلاب

دخلنا من البوبة الكبيرة

إنها مستشفى كبيرة جدا

عدة مبانى عديدة

مبانى متباعدة جداااااا عن بعض

يحيط كل مبنى سور كالذى يحيط الحيوانات بحديقة الحيوان

وداخل السور حديقة صغير بها اطلال من المزروعات

وبداخل الحديقة المبنى الذى يحتوى على عدة عنابر

دخلنا عبر باب السور الحديدى الى اطلال الحديقة

رأيت وجوة غريبة

وجة قاسية

تكاد ملامحهم ان تكون واحدة

ملامح متقاربة

كأنهم صنعوا من قالب وحد

انهم الأطباء والممرضين

(ملائكة الرحمة)

لم يدعونا أن ندخل العنبر

أخرجوا المرضى فى طابور كالمساجين الخطرين

حينما بدأوا الخروج

رأيتهم

رأيت وجوههم

ألتقت عينى بأعينهم

عيون حزينة

عيون غارقة بالدموع

عيون بيها نظرة غريبة لم أستطيع فهمها إلى الأن

نظرة رعب لكل من يرتدى (بالطو) أبيض

نظرة رعب ممزوجة بتوسل وأستعطاف

نظرة تصرخ وتقول كفىىىىىىى

وحين دققت النظر فيهم لم أستطع منع عينى من دمعة خائنة

نزلت رغما عينى

يرتدون أشباة الأقمشة الممزقة

رغم برودة الجو

تكشف عن جلدهم الهزيل المعذب

تكشف عن عظامهم الناخرة

تكشف عن جسد يرتعش خوفا وبردا

وخانتنى دمعة أخرى حين رأيت حالهم

وكأن كل فرد فيهم لم يرى شكلا من أشكال الماء منذ قرون

وجوة وأيدى وأشباة ملابس متسخة

وأرجل حافية تحاول أن تتحسس أرض تحتها

أعين معذبة تحاول أن تتعود على النور

وحين خرجوا طابور معذب منكسر

أجلسوهم فى الارض ملتصقين بسور المبنى بشكل موازى

كمساجين معتقلين فى أحدى الحروب القذرة

وأختاروا منهم دفعة لكى يجلس الطلاب معهم فى الحديقة

لم يكونوا يرفضون أى شئ

كانت نظراتهم الحزينة للبالطو الأبيض تذبحنى

نظرة رعب وهول وخوف

نظرة لا ولن أنساها أبدا

...............................

كانت فكرتى عن المرضى العقليين

هى الفكرى التى جائتنى من أفلامنا العربية القديمة

ولكن ذابت وتلاشت هذة الفكرة حين رأيتهم

أشخاص عاديين

منكسرين

لكل شخص منهم مرضة الخاص

هناك من لا يعرف المكان والزمان

تائة مسكين فى بحر الدنيا

وهناك من يختلق قصص غير حقيقة لحياتة السابقة

وهناك من لدية جنون العظمة

ولكنهم فى النهاية مساكين

وبغير ما يعانون من مرض فأنهم عاديين

تستطيع أن تتحدث وتتواصل معهم

وسوف يخافونك جدا وأنت ترتدى ذلك الوشاح المرعب

البالطو الأبيض

.........................

جلست أستمع الطلاب وهم يتحدثون إليهم

حدثونا عن ضرب كل من يرتدى بالطو أبيض لهم

ورأينا الأثر فى أجسادهم الهزيلة التى تكسوها طبقات الأوساخ

حدثونا عن قلة طعامهم

عن عدم وجود أدميتهم

.........................

رأيت توسلاتهم لكوب من الشاى الذى يرونة كل قرون

رأيت توسلاتهم لرغيف خبز يمنع تمزقات أمعائهم

رأيت إرتجافات أجساد نحيلة من البرد والجوع

......................

ذهبت اليوم مرة أخرى لأنى كنت أريد التصوير

أكتشفوا هويتى وأخذوا منى الكاميرا

وحرمت الدكتورة أختى من درجات أعمال السنة

لأنها السبب فى مجيئى

.................

قبل أن أغادرهم

نظرت لهم

خانتنى كل دموعى هذة المرة

تمنيت لو أستطيع أن أخد كل واحد فيهم

أربط على كتفة

بل أضمة وأشعرة بالأمان

وأخدة معى ليعيش بأدمية

تمنيت لو أستطيع إطعامهم

تحريرهم

تمنيت وتمنيت وتنميت

وأختنقت أمنياتى بالواقع

ولم يكن بيدى إلا أن أغادر

وفى قلبى حزن وأحباط وألم لم أشعر بة قبل ذلك

لم أشعر بة قط

2008/03/13

هناك من هم مثل الأحجار الكريمة لا نصنعها ولكن نبحث عنها



ناس كتير ممكن نشوفها ونقابلها كل يوم

بس مش كلهم ممكن يعلموا فينا ويسيبوا أثر طيب

أنا فى البوست دة بقدم شكر خاص

لأخوات بجد عرفتهم من عالم التدوين

أصدقائى وأخواتى أحمد الصباغ و بت خيخة وأى كلام

وبقولهم بجد موقفكوا معايا أثر فيا

مع أننا منعرفش بعض من زمان

وبقولك يا أحمد أنت بجد أحلى وأجدع أخ وصديق وفى عرفتة

وكلامك الجميل ليا لمصلحتى مش هنساة

وبقول لخيخة أنتى بجد كنتى أكتر من أخت

وحتى خوفك عليا فكراة لما بتزعقيلى

أنتوا بجد كنتوا معايا أحسن من أهل وأخوات

وجدعان بجد

أشكركم كل نصايحكم

أشكر بجد موقفكم معايا من غير ما أطلب

لأن بجد المعدن الطيب بيبان فى المواقف الصعبة

وحسيت بجد بخوفكم عليا وحبكم ليا

ويارب نفضل كدة أخوات وأصحاب على طول

بحبكم فى الله بجد

2008/03/08

فى المنوفية ... أوبجيكشن واحدة لا تكفى


ياترى 10 ÷ 6 = كام أصل أنا مش حافظة جدول الضرب

هاااا محدش عارف

طيب نطلع الألة الحاسبة بقى

امممممممممم ياااااااااااااااااااااااخبر

طلعلى الرقم دة

1.666666666666666666

طب

ياترى بقى 10 ÷ 8 = كام

هاااااااا

محدش عارف برضة

نشوف الألة الحاسبة

يالهوىىىىىىىىىىىىىىىىى

غطينى وصوتى يامااااااااااااااااا

تصوروا طلعلى 1.25

طبعا محدش فاهم اية الحكاية

الأرقام دى يا جماعة هى نصيب الفرد من الخبز يوميا فى محافظة المنوفية

دة بإفتراض فى الحسبة الأول أسرة مكونة من 6 أفراد

والحسبة التانية أسرة مكونة من 8 أفراد

ومش هفترض عدد أزيد لحسن أصاب بجلطة فى المخ

محدش يرمى نفسة من فوق ولا يشرب جاز يا جماعة الجاز شاحح اليومين دول

أفهمكم أنا

من شهر وشوية كدة كانت خالتى وولادها عندنا اللى هيا ساكنة فى محافظة المنوفية

وساعة الغدا بصت للعيش عندنا كدة وقالت بعد مصمصة الشفايف

أنتوا فى نعمة مع نظرات حسد خبيثة

عندنا عملوا نظام جديد للعيش

بطاقة زى بطاقة التموين كدة ( للى يوعى على بطاقة التموين أصلا) بقى العيش

أشتراك شهرى 34 ج لكل أسرة واحدة فقط

و من 10 ل 14 رغيف فى اليوم لكل أسرة واحدة برضة

وطبعا 14 دى محدش بيشوفها

وسواء كانت الأسرة فردين هما 10 أو كانت 12 فرد هما 10 برضة

رقعت أنا بالصوووووووووووووت وعنيا برقت ومصدقتش

قولت أروح أشوف القصة

ورحت من فترة كدة عاينت على الطبيعة

ومن أمام فرن هنائى الليثى بأسطنها لاقيت ناس كتير واقفة مستنية العيش يجى

وأجريت هذة الحوارات

أنا : أتعرف بيكى يا حاجة

مواطنة من محافظة المنوفية : خالتك أم رضا

أنا : أية رأيك فى النظام دة

المواطنة : والله حرام عليهم أنا العيش عندنا بقى فاكهة ومش لاقين ناكل

والخبيز بقى يتكلف كتير وكلكم عارفين الدقيق بقى بكام

والمحافظة مبقتش بلد أرياف زى زمان بقت زيها زى المدينة بالظبط

وكان لى هذا اللقاء أيضا

أنا : أتعرف بيك يا حج

المواطن :بسم الله الرحمن الرحيم إبراهيم السيد

أنا : أية رأيك فى النظام دة

المواطن : نظام أية هو بقى فية نظام ولا أى حاجة

تصورى العيش بيجى س 12 ظهرا وبيخلص 12 وتلت

يعنى محدش يروح شغلة ولا مدرستة ولا جامعتة ولا يفطر ويقعد يستنى العيش من 6 صباحا

عشان يلحق ال 10 أرغفة بتوعة لحسن يروحوا علية

ومن أمام طابونة النعيرى بالباجور

شفت مهازل ما بعدها مهازل

أى مهازل فيكى يا محروسة لا تعادل 0/10 من إللى حصل هناك

الكل بيتصارع من أجل ال 10 أرغفة

الكل شهيد ال 10 أرغفة

وروحت وأنا بحاول أقسم الرغيف وربع نصيب الفرد على اليوم

ربع للفطار

وربع للعشاء

ونص للغذاء

بصراحة رجييييم هااااااااااااايل

الحكومة عاوزهم يخسوا يا جماعة شافتهم كلبظوا وقالت لازم رجيم إجبارى

فيها أية دى حاجة عجيبة والله .. ظلمنا الحكومة معلشى

شعب زبالة صحيح مش عارف مصلحتة فين

!!!!!!!!!!!!!!!!


منتظرين بقى بطاقة بإشتراك شهرى للهواء

نفسين قبل العشا

ونفسيين قبل الفطار

ونفسيين قبل النوم

بإشتراك شهرى 500 ج مثلا

يابلاش والله


كانت معكم مروة الزارع

من أمام فرن هنائى الليثى أسطنها وطابونة النعيرى الباجور

محافظة المنوفية

2008/03/04

فضى عقلك .. أفتح بقك .. برق عينك .. شغل المفسديون



الوضع : لسة صاحية من النوم منكوشة الشعر وعنيا معمصة


وهدومى مفعكشة عالأخر ومتأخرة على الشغل ومخنوقة ونفسى أكل سندوتش ديناميت فول وطعمية وبتنجان وبيض


الحدث : فتحت التلفزيون وقولت أتفرج على حاجة كدة على السريع وفتحت أحدى قنوات الأفتكاسات الدينية الحديثة


ولاقيت واحدة على الهاتف بتسأل فضيلة الشيخ وبتقولة


يافضيلة الشيخ أنا واحدة متجوزة ومرتبطة بواحد متجوز ياترى حرام ولا حلال


إجابة فضيلة الشيخ : ورحمة فراخ ستى ما فهمت منها حاجة كل اللى أنا فهماة أنة رد فى حاجة تانية خالص


وطلع إبن عم مرات خال المخرج فى الاخر هو اللى غلطان


الإجابة المفتكسة : والله يابنتى لو أسمة محمد يبقى حلال ولو أسمة توم أو جاك يبقى إبن كلب واطى حرام


إجابتى أنا : أوبجيكشن بالعربى


(بالمطراوى بالأصح)


......................................................................


الوضع : قاعدة بحك وشى بحجر الحمام عشان ابيض يوم الجمعة بعد حمومة الشهر يعنى


الحدث : فى برنامج مصيبة شلباية سألت احدى الفتيات المستهبلات عبر الهاتف


أنا بحبك موت موت موت موت وكنت عاوزة اسألك سؤال


إزاى أبيض عشان لما ألبس البكينى فى الصيف والصيف داخل وكل سنة وانتى طيبة


ابقى مزة كدة على الشط


إجابة مصيبة شلباية : لية يابنتى تبيضى دا السمار موضة الأيام دى زيى كدة وهتبقى فى المايوة مزة جداااا


الإجابة المفتكسة : ولية المايوة يا حبيبتى خليها ملط احسن دى حتى موضة زيى كدة


إجابتى أنا : أوبجيكشن بالعربى


(بالمطراوى بالأصح)


.....................................................


الوضع : كنت لسة راجعة من الشغل وكابس عليا النوم وعمالة أتاوب ومش قادرة خالص


قلت أقلب تقليبة كدة فى المفسديون قبل ما أنام


الحدث : لاقيت الرجل بتاع تفسر الأحلام وواحدة بتتصل بية


أزيك يا فضيلة الشيخ والله وحشتنا جدا وانا مش مصدقة نفسى أنا هنتحر من الفرحة


أناا حاسة أنى مش قادرة من الصدمة


أنا حلمت إمبارح حلم فظيع فظيع فظيع


حلمت أنى بعمل طشة ملوخية وبتعمل طشششششششششششش


إجابة الشيخ مفسر البتنجان : والله أعتقد إن معناها خير كثير جاى ليكى فى الطريق


بإذن الله


الإجابة المفتكسة : والله يابنتى لازم تحددى هيا ملوخية ناشفة ولا خضرا ومعمولة على فراخ ولا لحمة ولا ارانب ولا قرديحى


إجابتى أنا : أوبجيكشن بالعربى


(بالمطراوى بالأصح)